Mynd: EPA-EFE - AAP
Athugið þessi frétt er meira en 2 ára gömul.
Býst við að mynda samsteypustjórn á Nýja-Sjálandi
Jacinda Ardern, forsætisráðherra Nýja-Sjálands, hefur gefið í skyn að hún hyggist mynda samsteypustjórn. Talningu atkvæða í þingkosningum er ekki lokið en allt bendir til þess að Verkamannaflokkur Ardern hafi fengið hreinan meirihluta þingsæta.
Verkamannaflokkurinn vann mikinn sigur í kosningunum og hefur líklega fengið 64 þingsæti af 120 á þingi Ný-Sjálendinga. Það er besti árangur flokksins í meira en hálfa öld.
Sigurinn þakkaður Ardern
Sigurinn er þakkaður Jacindu Ardern sem nýtur virðingar landsmanna fyrir viðbrögð við hryðjuverkaárás í Christchurch í fyrra og einnig vegna skeleggra aðgerða í baráttunni við COVID-farsóttina. Græningjar bættu einnig við sig í kosningunum og hafa leiðtogar flokksins lýst áhuga á stjórnarþátttöku. Ardern hefur sagt að hún búist við að ný ríkisstjórn geti tekið við eftir tvær til þrjár vikur.
