Landlæknir braut á sjúkraliða sem var bakvörður í vor

Mynd með færslu
 Mynd: Facebook - RÚV
Sjúkraliði sem var bakvörður í kórónuveirufaraldrinum í vor en var synjað um starfsleyfi hefur fengið mál sitt tekið upp að nýju. Landlæknisembættið hafnaði umsókn hennar en nú hefur heilbrigðisráðuneytið komist að þeirri niðurstöðu að sú ákvörðun hafi ekki verið tekin á réttum lagagrundvelli.

Agnes Veronika Hauksdóttir gerðist bakvörður á hjúkrunarheimilinu Berg í Bolungarvík í vor þaðan sem hún rekur ættir sínar.

Amma hennar vakti landsathygli þegar hún jafnaði sig af COVID-19, þá 103 ára gömul. Agnes útskrifaðist sem sjúkraliði árið 2007 en 2011 fór hún að vinna sem leikskólakennari og er nú deildarstjóri á leikskóla.

Eftir að mál annars bakvarðar, sem grunaður er um að hafa villt  á sér heimildir sem fagmenntaður heilbrigðisstarfsmaður var óskað eftir gögnum frá Agnesi sem sönnuðu að hún væri sjúkraliði. Þar sem hún hafði aðeins menntun en ekki starfsleyfi var henni bent á að senda inn skriflega umsókn. 

Landlæknir hafnaði umsókninni og rökstuddi þá ákvörðun að hún hefði ekki viðhaldið kunnáttu sinni frá útskrift með því að vinna sem sjúkraliði frá því að náminu lauk. Hún hefði aðeins starfað sem slíkur í rúm þrjú og hálft ár. Lögmaður Agnesar óskaði eftir endurskoðun á þessari ákvörðun en landlæknisembættið staðfesti niðurstöðu sína í maí á þessu ári - Agnes hefði ekki viðhaldið þekkingu sinni og færni.

Niðurstaðan var kærð til heilbrigðisráðuneytisins þar sem Agnes benti meðal annars á að synjun landlæknis þýddi að hún væri svipt starfsleyfi.  Það gæti ekki staðist að sjúkraliði sem tæki ákvörðun um að starfa á öðrum vettvangi glataði starfsréttindum sínum sem sjúkraliði til frambúðar. Með því væri landlæknisembættið að segja að menntun hennar væri fyrnd og ef hún vildi starfa sem sjúkraliði þyrfti hún að hefja nám aftur frá byrjun.

Þessu hafnaði landlæknisembættið en sagði að það teldi sig ekki hafa heimild til að veita henni starfsleyfi sem sjúkraliða á grundvelli 13 ára gamallar menntunar.

Heilbrigðisráðuneytið bendir hins vegar á að engar  breytingar hafi orðið á námskröfum  og nám Agnesar sé frá viðurkenndri námsstofnun. 

Þá segir ráðuneytið að þótt kveðið sé á um að sjúkraliðum beri að viðhalda þekkingu sinni og faglegri færni og tileinka sér nýjungar sem varði starfið þá sé þetta ekki sjálfstætt skilyrði fyrir veitingu starfsleyfis. 

Ráðherra hafi í tilviki sjúkraliða ekki farið þá leið að setja þessa kröfu sem skilyrði fyrir starfsleyfi. Landlæknisembættið hafi því ekki leyst úr málinu á réttum lagagrundvelli og beri því að taka málið upp aftur. Úrskurður ráðuneytisins birtist á vef stjórnarráðsins í gær.

Agnes segir í samtali við fréttastofu að úrskurður ráðuneytisins hafi komið fyrir rúmri viku en þrautagöngunni hafi þar með ekki verið lokið. Hún hafi strax sent inn umsókn um starfsleyfi en ekki fengið nein svör. Hún hafi síðan hringt á miðvikudag og óskað eftir því að embættið staðfesti að minnsta kosti að hafa fengið umsókn hennar. Sú staðfesting barst loks daginn eftir. 

Hún segir málið hafa haft töluverð áhrif á sínum tíma því hún hafi fengið það viðhorf að hún væri ekkert öðruvísi en bakvörðurinn sem hefur verið sakaður um að villa á sér heimildum.  En þrátt fyrir allt sem á undan er gengið segir Agnes að hún myndi sækja um aftur sem bakvörður.

 

freyrgigja's picture
Freyr Gígja Gunnarsson
Fréttastofa RÚV
Síðast:
Þessi þáttur er í hlaðvarpi