Athugið þessi frétt er meira en 11 mánaða gömul.

Fallið frá mislægum gatnamótum við Arnarnesveg

14.10.2020 - 16:54
Mynd með færslu
 Mynd: Reykjavíkurborg - RÚV
Vegagerðin ætlar að breyta útfærslu fyrirhugaðra vegamóta við Arnarnesveg og Breiðholtsbraut. Fallið er áformum um mislæg gatnamót en í stað þess verða sett ljósstýrð gatnamót.

Fyrsti áfangi Arnarnesvegar var byggður á milli Fífuhvammsvegar og Rjúpnavegar, annar áfangi var opnaður árið 2016 og var frá Reykjanesbraut að Fífuhvammsvegi.

Hringtorg, brú og ljós

Þriðji áfangi, sem nú er fyrirhugaður, er á milli Rjúpnavegar í Kópavogi að Breiðholtsbraut í Reykjavík og er um 1,3 km að lengd. Samkvæmt nýju tillögunni verður hringtorg við Vatnsendahvarf, brú yfir Breiðholtsbraut fyrir akreinar og stíga, og tenging við Breiðholtsbraut með umferðarljósum. Núverandi ljósastýrð vegamót við Vatnsendaveg verða felld niður en þó verða þar leyfðar hægribeygjur.

Skipulagsstofnun vann matskýrslu fyrir Arnarnesveg árið 2003. Vegagerðin ætlar að senda fyrirspurn til Skipulagsstofnunar varðandi breytingarnar. Til að draga úr hljóðmengun er gert ráð fyrir 1,5 metra háum hljóðvegg á brú og rampa við Breiðholtsbraut auk endurbættrar hljóðmanar milli nýrra gatnamóta og undirganga milli Jaðarsels og Suðurfells.

Vetrargarðinum ekki raskað

Í frétt á vef Reykjavíkurborgar segir að þegar hverfisskipulag fyrir Breiðholt var kynnt fyrr í haust hafi borist margar athugasemdir þar sem lýst var yfir áhyggjum af því að fyrirhuguð lagning Arnarnesvegar myndi skerða Vetrar­garðinn sem á að reisa efst í Seljahverfi. Þessi nýja blandaða lausn fyrir gatnamót við Breiðholtsbraut er hagkvæm fyrir garðinn og þá fjölbreyttu starfsemi sem verður þar allan ársins hring. 

Á vef Vegagerðarinnar segir að mikill þrýstingur sé á þessa framkvæmd þar sem umferðartafir við núverandi vegamót  Arnarnes­vegar og Vatnsendahvarfs séu miklar og umferðaröryggi ekki ákjósanlegt. Í mars 2019 hafi stjórn Slökkviliðs höfuðborgarsvæðisins ritað áskorun til samgönguráðherra þess efnis að hefja framkvæmdir sem fyrst og í umferðaröryggisáætlun Reykjavíkurborgar er lögð áhersla á lagfæringar á vegamótunum.