Athugið þessi frétt er meira en 11 mánaða gömul.

Atvinnuleysisspáin versnar með hverjum mánuðinum

14.10.2020 - 08:18
Unnur Sverrisdóttir, forstjóri Vinnumálastofnunar.
 Mynd: Kristinn Þeyr Magnússon - RÚV
„Í síðastliðinni viku hafa atvinnuleysisspárnar hjá okkur verið að versna,“ segir Unnur Sverrisdóttir, forstjóri Vinnumálastofnunar, í samtali við fréttastofu. „Nú er að ganga eftir það sem okkur sýndist í september, þetta versnar með hverjum mánuðinum,“ segir hún.

Atvinnuleysi mældist 9 prósent í september og samkvæmt nýrri septemberskýrslu Vinnumálastofnunar má búast við því að það haldi áfram að aukast næstu mánuði og verði jafnvel 10,6 prósent í desember.  

Sem fyrr er atvinnuleysið langmest á Suðurnesjum og þar jókst það einnig mest milli mánaða. Atvinnuleysið mældist þar 18,6 prósent og samkvæmt spá Vinnumálastofnunar má búast við að það verði 19,8 prósent í október og 21,9 prósent í desember. 

Þriðja bylgjan hefur skýr áhrif

Unnur segir að þriðja bylgja faraldursins hafi augljós áhrif á vinnumarkaðinn: „Það er bara þessi veira. Ferðamannaiðnaðurinn er alveg frosinn aftur og það eru ruðningsáhrif að koma fram, síðastliðna 7-8 mánuði, síðan þetta ástand byrjaði. Það eru fleiri og fleiri að gefast upp, það er eina skýringin á þessu.“

Þá bendur hún á að atvinnuleysi aukist alltaf á haustin: „Þá fer sumarvinnan og dregur úr framkvæmdum. Það hefur alltaf dregist saman á íslenskum vinnumarkaði á veturna.“

Aðspurð um langtímaatvinnuleysi segir Unnur það mikið áhyggjumál hversu hratt bætist í hóp þeirra sem hafa verið atvinnulausir lengur en í sex mánuði, en þeir eru nú orðnir 5.000. Þá hafi sennilega í kringum 2.000 verið atvinnulausir lengur en í 12 mánuði.

Vonar að ástandið batni hratt þegar faraldurinn gengur niður

Hún segist þó binda vonir við að ástandið batni hratt um leið og faraldurinn gengur niður, enda séu vinnufúsar hendur nú á atvinnuleysisbótum. „Það sem er óvenjulegt við þessa kreppu er að þetta er auðvitað langmest í sama geira. Þetta er langmest í ferðageiranum og um leið og við sjáum fram á að eitthvað glæðist, þá mun fólk fá vinnu vonandi frekar hratt.