Athugið þessi frétt er meira en mánaðargömul.

Frívaktin svaf af sér veiðina í örstuttum síldartúr

12.10.2020 - 17:09
Mynd með færslu
 Mynd: Hákon Ernuson/svn.is
Börkur landaði síld í Neskaupstað í gærmorgun eftir örstutta veiðiferð á miðin austur af landinu. Veiðiferðin var raunar svo stutt að þeir skipverjar sem voru á frívakt sváfu af sér veiðina.

Í samtali við heimasíðu Síldarvinnslunnar segir Hjörvar Hjálmarsson skipstjóri, að veiðiferðin hafi aðeins tekið tólf tíma. Þeir hafi farið norður á Glettinganesflak og séð þar mikla síld.

Fengu 872 tonn á klukkutíma

„Við köstuðum og fórum rétt inn í lóðninguna og hífðum síðan. Við drógum í um það bil klukkutíma. Aflinn reyndist vera 872 tonn af stórri og fallegri síld og við héldum strax af stað í land með það. Þetta er óvenju stuttur túr og til marks um það þá sváfu þeir sem voru á frívakt af sér veiðina. Þeir vöknuðu ekki fyrr en við vorum komnir langleiðina í land,“ segir Hjörvar.

Með allra þægilegustu síldarvertíðum

Hann segir reyndar að þessi túr hafi verið sérstakur, en síldveiðin í haust hafi almennt verið afskaplega þægileg. Síldin dvelji lengur upp við landið en síðustu ár og það sé nóg af henni. „Það er bæði þægilegt og ódýrt að gera út á veiðarnar við þessar aðstæður og fullyrða má að þetta sé með alþægilegustu vertíðum.“