Iðnaðarvörur voru rúmlega helmingur alls útflutnings. Mynd: Anton Brink - Ruv.is
Athugið þessi frétt er meira en 12 mánaða gömul.
Meirihluti starfsmanna Rio Tinto á leið í verkfall
Félagsmenn í fimm af sex stéttarfélögum hjá Rio Tinto samþykktu verkfallsboðun með miklum meirihluta, þ.e. félagsmenn rafeindavirkja, Félags íslenskra rafvirkja, FIT, VM og Hlífar og hefjast því skæruverkföll hjá þeim í næstu viku. Félagsmenn VR felldu hins vegar boðun verkfalla á jöfnu. Kolbeinn Gunnarsson, formaður Hlífar segir að ekki hafi verið boðað til nýs fundar í deilunni sem er hjá ríkissáttasemjara.
„Niðurstöðurnar eru afgerandi. Þeir sem voru fylgjandi því að fara í verkföll voru um 80% af þeim sem greiddu atkvæði,“ segir Kolbeinn. „Félagsmenn stéttarfélaganna sem samþykktu verkfallsboðunina hefja því skærur núna 16. október, á föstudaginn. kröfur starfsmanna hljóða upp á að launahækkanir séu sambærilegar og samið var um í lífskjarasamningum.“ Ef ekki semst fara sömu starfsmenn í ótímabundið allsherjar verkfall frá 1. desember.
Atkvæðagreiðslunni lauk um hádegisbil í dag. Hjá Hlíf starfa rúmlega 200 í álverinu. 68% af þeim greiddu atkvæði, 80% sögðu já, 12% nei og 6% tóku ekki afstöðu. Alls voru rúmlega 300 á kjörskrá, langflestir hjá Hlíf en fæstir hjá VR. Í álverinu starfa rúmlega 400 manns.
Samningar félaganna hafa verið lausir síðan í byrjun júlí, en samið hafði verið um 24.000 króna launahækkun í mars með þeim fyrirvara að Rio Tinto næði nýjum raforkusamningum við Landsvirkjun fyrir lok júní. Þegar það tókst ekki féllu samningarnir úr gildi og var deilunni vísað til ríkissáttasemjara.
