Athugið þessi frétt er meira en 7 mánaða gömul.

Hafði ekki orð á að brottvísunarbúðir stæðu til hér

06.10.2020 - 14:55
Mynd með færslu
 Mynd: Skjáskot
Áslaug Arna Sigurbjörnsdóttir dómsmálaráðherra segist ekki hafa haft orð á því á þingi í gær að til stæði að koma hér á fót því sem kallaðar hafa verið brottvísunarbúðir fyrir fólk sem dvelur ólöglega í landinu. Hún hafi aðeins vísað til þeirrar framkvæmdar sem nær öll Evrópuríki, þeirra á meðal Norðurlöndin, grípi til þegar búið sé að taka ákvörðun um brottvísun.

Ummæli Áslaugar í gær hafa vakið hörð viðbrögð víða. Bjarkey Olsen Gunnarsdóttir, þingflokksformaður Vinstri grænna, sagði á þingi í morgun að slíkar stöðvar væru ekkert annað en flóttamannabúðir eða fangelsi, það væri fráleit hugmynd að koma slíkum búðum á fót hér og að þingflokkur Vinstri grænna mundi aldrei samþykkja slíkt.

Slíkt búsetuúrræðu skal vera til staðar, segir ráðherra

„Staðreyndin er á hinn bóginn sú að skv. tilskipun Evrópusambandsins skal vera til staðar slíkt búsetuúrræði þegar öll önnur vægari úrræði eru tæmd,“ skrifar Áslaug Arna á Facebook í dag. „Við höfum ekki innleitt þá tilskipun að fullu þrátt fyrir skuldbindingar þess eðlis í Schengen samstarfinu.“

Hún segir að það hvernig tekið sé á móti fólki og búið í haginn fyrir þá sem eru ýmist að bíða eftir afgreiðslu eða hafi fengið niðurstöðu sé á meðal þeirra brýnu verkefna sem þurfi að skoða nánar og verði að vera hægt að ræða af yfirvegun. Allir vilji vanda sig í þessum viðkvæmu málum, sérstaklega þegar málin snúi að börnum. Móti þurfi heidlarstefnu sem hægt sé að koma sér saman um og eins að finna lausnir á praktískum atriðum. „Allt er þetta í samræmi við það sem ég hef áður sagt,“ skrifar dómsmálaráðherra.

Mynd með færslu
Mynd: Alþingi / Alþingi
Úr ræðu Áslaugar frá í gær.