Bashar al-Assad, forseti Sýrlands. Mynd: EPA-EFE - EPA
Athugið þessi frétt er meira en 8 mánaða gömul.
Segir Rússa tryggja valdajafnvægi
Rússar veita viðnám gegn vestrænum áhrifum í Austurlöndum nær með herstöðvum sínum í Sýrlandi. Þetta sagði Bashar al-Assad, forseti Sýrlands, í viðtali á Zvezda, sjónvarpsstöð rússneska varnarmálaráðuneytisins, í tilefni þess að fimm ár eru síðan hernaðaríhlutun Rússa hófst í landinu.
Assad sagði að áður en Rússar hófu bein afskipti að stríðinu hefði sýrlenski herinn átt undir högg að sækja gegn vopnuðum sveitum sem fengið hefðu vopn frá Vesturveldunum, Sádi-Arabíu og Katar. Með dvöl sinni í Sýrlandi tryggðu Rússar valdajafnvæði sem Sýrland nyti góðs af.
Rússar hafa herstöð á Hmeimim-flugvellinum í vesturhluta Sýrlands og einnig flotastöð við borgina Tartus, sem er eina bækistöð Rússa við Miðjarðarhaf.
