Fylkismönnum verulega brugðið vegna ummæla Rúnars

Mynd með færslu
 Mynd: Mummi Lú - RÚV

Fylkismönnum verulega brugðið vegna ummæla Rúnars

01.10.2020 - 13:11
Knattspyrnudeild Fylkis sendi í dag frá sér yfirlýsingu vegna ummæla Rúnars Kristinssonar, þjálfara KR, eftir leik liðanna í Pepsi Max deild karla á sunnudag. Rúnar vill ekki tjá sig um yfirlýsinguna að sinni.

Fylkir vann leikinn á Meistaravöllum 2-1 eftir að hafa fengið vítaspyrnu í uppbótartíma þegar Beitir Ólafsson, markvörður KR, sló til Ólafs Inga Skúlasonar, Fylkismanns, þegar boltinn var fjarri. Beitir fékk að auki rautt spjald.

Það er óhætt að segja að dómurinn hafi farið illa í Rúnar. Í samtali við Vísi eftir leik sagði hann m.a.:

„Fíflagangurinn í Ólafi Inga Skúlasyni. Hann leitar með höfuðið í höndina á Beiti þegar hann er löngu búinn að kasta boltanum út. Hann er bara með leikrit og hann hefur gert þetta oft áður og hann er að reyna að eyðileggja leikinn á þennan hátt. Þegar lið vinna á þennan hátt þá er þetta bara svindl og svínarí. Það er ofboðslega leiðinlegt að horfa upp á þetta.“ 

Við fótbolta.net sagði Rúnar:

„Þeir fá bara gefins rautt spjald og víti sem er algjört kjaftæði, þetta er bara fíflagangur í Ólafi Inga, hann hagar sér eins og hálfviti inná vellinum og fiskar rautt spjald á markmanninn okkar og hendir sér niður. Hann leitar með höfuðið í hendina á Beiti sem er löngu búinn að kasta boltanum út og þetta er bara ljótt og við viljum ekki sjá þetta í fótbolta.''

„Þjálfari KR viðhafði fordæmalausan óhróður“

Stjórn knattspyrnudeildar Fylkis sendi svo frá sér yfirlýsingu um ummælin í dag. Þar segir: 

„Okkur var verulega brugðið þegar þjálfari KR viðhafði fordæmalausan óhróður um leikmann Fylkis, Ólaf Inga Skúlason og vændi leikmanninn og liðið allt um að stunda ítrekað svindl og svínarí í gegnum tíðina í viðtölum eftir leik liðanna. Fleiri miður falleg og einstaklega ósvífin orð voru látin falla sem verða ekki tíunduð hér en eru þjóðinni kunn og eru honum og félaginu KR til háborinnar skammar. “

Fylkismenn segja það part af leiknum að vera ósammála um atvik eða frammistöðu leikmanna eða dómara og hafa á þeim sterkar skoðanir en ummælin sem um ræði hafi farið út fyrir velsæmismörk. Ekki kemur þó fram nákvæmlega hvaða ummæli það eru sem Fylkismenn telja þetta gilda um.

Stjórnin lýkur yfirlýsingu sinni á að árétta að Fylkir muni ekki kæra ummæli Rúnars til aga- og úrskurðarnefndar KSÍ en „láta þess í stað KSÍ það eftir að taka þetta mál til skoðunar með það fyrir augum að standa vörð um háttvísi íslenskrar knattspyrnu og setja umræðunni takmörk.“ 

Uppfært kl. 13:14
Rúnar Kristinsson vildi ekki tjá sig um yfirlýsingu Fylkis að svo stöddu. Hann sé að undirbúa lið sitt undir leik gegn Víkingi í úrvalsdeildinni í kvöld og einbeiti sér að því um sinn.

Yfirlýsingu Fylkis má lesa hér:

Yfirlýsing frá Stjórn Knattspyrnudeildar Fylkis 

Vegna grófra ummæla Rúnars Kristinssonar þjálfara KR í viðtölum á Stöð 2 og fótbolta.net eftir leik KR og Fylkis s.l. sunnudag langar okkur að koma eftirfarandi á framfæri

Okkur var verulega brugðið þegar þjálfari KR viðhafði fordæmalausan óhróður um leikmann Fylkis, Ólaf Inga Skúlason og vændi leikmanninn og liðið allt um að stunda ítrekað svindl og svínarí í gegnum tíðina í viðtölum eftir leik liðanna. Fleiri miður falleg og einstaklega ósvífin orð voru látin falla sem verða ekki tíunduð hér en eru þjóðinni kunn og eru honum og félaginu KR til háborinnar skammar.  

Rétt er að taka fram að það er partur af leiknum að vera ósammála um atvik í leikjum eða frammistöðu leikmanna og dómara og hafa á þeim sterkar skoðanir.   Þau ummæli sem hér um ræðir voru hins vegar einstaklega persónulegar ærumeiðingar sem að mati okkar Fylkismanna fóru langt út fyrir þau velsæmismörk sem eðlilegt er að setja bæði til að vernda leikmenn og starfsmenn leikja.  Slík mörk eru ekki síður mikilvæg til að viðhalda virðingu leiksins og sýna ábyrgð út á við af þeim sem eru sterkar fyrirmyndir margra og ekki síst barna og ungmenna.

Við hjá knattspyrnudeild Fylkis höfum haft miklar mætur á Rúnari Kristinssyni sem á einstaklega glæsilegan knattspyrnuferil að baki jafnt með félagsliðum og landsliðum þar sem hann hefur iðulega komið fram af prúðmennsku. Hefur hann sem þjálfari jafnframt iðulega komið vel fram í fjölmiðlum og verið málefnalegur, agaður og hófstilltur.  Af þessum ástæðum svíður það enn meir að hann skuli viðhafa þessi bersýnilegu röngu og meiðandi ummæli um leikmann okkar og lið enda er hlustað á hann og tekið mark á honum.   

Eftir stendur hins vegar að flestir þeir hlutlausu sérfræðingar sem hafa tjáð sig um umrætt atvik eru sammála um að ákvörðun dómara hafi verið rétt.  Jafnframt hefur enginn tekið undir ummæli þjálfarans um óheiðarleika og svindl af hálfu umrædds leikmanns né hafa verið sett fram dæmi sem styðja þessi ummæli.   Það eru hins vegar til nýleg dæmi þar sem að Rúnar hrósaði leikmanni sínum eftir að leikmaðurinn viðurkenndi að hafa „fiskað“ annan leikmann af velli með leikaraskap.   Framangreind ummæli Rúnars dæma sig því sjálf.   Hið rétta er eins og allir vita sem til þekkja að Ólafur Ingi Skúlason er frábær leikmaður og persónuleiki bæði innan og utan vallar sem á glæsilegan feril að baki bæði með félagsliðum og íslenskum landsliðum.  Hann getur verið fastur fyrir á vellinum en hann er langt frá því að vera óheiðarlegur leikmaður eða svindlari.

Forráðamenn Fylkis hafa ávallt lagt sig fram við að eiga gott samstarf við KR og hefur það oftast gengið eftir.  Stuðningsmenn þeirra eru einstakir og okkur hlakkar alltaf til komu þeirra í Árbæinn.   Það er hins vegar miður að KR hefur ekki séð ástæðu til að biðjast afsökunar eða með öðrum hætti að bera klæði á vopnin.   Með þessu er þetta stórveldi í íslenskri knattspyrnu að setja ný háttsemis- og samskiptaviðmið.

Við Fylkismenn höfum hins vegar ákveðið að setja þetta mál aftur fyrir okkur með þessari yfirlýsingu og munum þess í stað einbeita okkur að leiknum sjálfum og þeim fjölmörgu verkefnum sem þessir fordæmalausu tímar hafa lagt á íþróttahreyfinguna.  Þannig stuðlum við best að öflugu starfi knattspyrnudeildar Fylkis bæði í meistaraflokkum karla og kvenna og í yngri flokkum þar sem við munum áfram leggja áherslu á háttvísi innan og utan vallar.

Í framangreindu ljósi hefur stjórn Knattspyrnudeildar Fylkis ákveðið að senda ekki inn kæru til Aga- og úrskurðarnefdar KSÍ vegna þessara ummæla þjálfarans en láta þess í stað KSÍ það eftir að taka þetta mál til skoðunar með það fyrir augum að standa vörð um háttvísi íslenskrar knattspyrnu og setja umræðunni takmörk. 

Máli þessu er hér með lokið af okkar hálfu.

Fyrir hönd Knattspyrnudeildar Fylkis 

Kjartan Daníelsson