Lygalíf fullorðinna fjallar um uppvöxt ungrar stúlku, að nafni Giovanna, í efri byggðum Napólí. Lesendur kynnast Giovönnu þar sem hvörf verða í lífi hennar þegar hún kemst að því að hún á ættingja í fátækari hluta borgarinnar, nánar til tekið föðursystur sem hún hefur aldrei kynnst. Giovanna verður heltekinn af föðursysturinni, henni Vittoriu, svo hún ákveður að gera sér ferð í neðri byggðir borgarinnar til að kynnast henni. Gagnrýnendur Kiljunnar eru sammála um að bókin beri af og nefna sérstaklega persónusköpunina, sem sé framúrskarandi og sannfærandi.

„Vittoria er risapersóna, hún er heillandi en skapbráð, stór og mikil og eldfimur karakter. Hún stendur fyrir þetta sem er ekki fágað eða settlegt og passar ekki vel í þetta slétta og fellda umhverfi hennar,“ segir Sunna Dís Másdóttir. „[Ferrante] er mikill rithöfundur en hún er lesendavæn og höfðar til stórs hóps. Þetta eru alvöru bókmenntir.“

„Það er eitt sem hún gerir svo fjári vel í þessari bók, sem er svo erfitt og er oft akkilesarhæll bóka. Það er þegar þú ætlar að búa til persónu sem er svo ofboðslega góð og svo ofboðslega vitur og einhvern veginn heillar alla í kringum sig, að þá þarft þú að skrifa hana heillandi,“ segir Þorgeir Tryggvason.

Egill Helgason segir að viðtökurnar á verkum Ferrante á heimsvísu séu slíkar að hugsanlega séu Nóbelsverðlaun ekki fjarri undan.