Athugið þessi frétt er meira en 7 mánaða gömul.

Umdeild lóð skammt frá nýja íbúðarhverfinu á Akureyri

30.09.2020 - 10:06
Mynd: Gunnlaugur Starri Gylfason / RÚV
Umgengni á rúmlega 50 þúsund fermetra lóð steypustöðvar á Akureyri hefur stöðvað afgreiðslu á starfsleyfi fyrirtækisins. Heilbrigðisfulltrúi segir svæðið lengi hafa verið til vandræða.

Skammt frá nýju íbúðarhverfi

Akureyrarbær kynnti í síðustu viku tillögu að deiliskipulagi fyrir nýtt 300 íbúða hverfi. Nýja hverfið verður skammt frá lóð Skútabergs. Umgengni á lóðinni hefur verið til umfjöllunar hjá bænum um nokkurt skeið, nú síðast hjá heilbrigðisnefnd eftir að fyrirtækið óskaði eftir framlengingu á starfsleyfi fyrir steypustöð.

„Langvarandi vandamál“

Svæðið sem fyrirtækið hefur undir starfsemi sína er um 50 þúsund fermetrar. Það samsvarar stærð rúmlega sjö knattspyrnuvalla í fullri stærð. Alfreð Schiöth, framkvæmdastjóri Heilbrigðiseftirlits Norðurlands eystra segir lóðin hafa lengi hafa verið til vandræða en umsókn fyrirtækisins var frestað. 

„Allir sem þekkja til vita að þarna er mikið safn af gömlu dóti á lóðinni og umgengnin er svona þannig að fólk, flest, upplifir þetta með neikvæðum mjög hætti og þetta er búið að vera langvarandi vandamál. Þetta hefur nú verið vandræðalóð til langs tíma og fyrirtækin sem hafa verið þarna í gegnum tíðina hafa gefið góð orð um úrbætur og að einhverju leyti hefur það gengið eftir en alls ekki nægilega vel,“ segir Alfreð.

Lofa úrbótum

Þór Konráðsson, einn eiganda Skútabergs segir að vinnu við að laga til á lóðinni þegar farna af stað. „Það eru hlutir sem við erum að vinna í núna og taka til svona dót sem að mætti vissulega vera búið að henda einhverju síðan sko.“

Þannig að þetta stendur til bóta?

„Já við erum að vinna að þessu að kappi og fylgja eftir þessari áætlun sem við erum að leggja fyrir þá núna.“

Mynd með færslu
Holtahverfi norður