Skerða snjómokstursþjónustu á Akureyri til að spara

30.09.2020 - 16:41
Mynd með færslu
 Mynd: RÚV
Akureyrarbær stefnir á að spara allt að fimmtíu milljónir króna með skertri þjónustu við snjómokstur í vetur. Formaður umhverfis- og mannvirkjaráðs segir heimsfaraldurinn hafa sýnt að ekki sé nauðsynlegt fyrir alla að komast leiðar sinnar klukkan átta alla morgna.

Liður í því að rétta af hallarekstur

Ný bæjarstjórn á Akureyri sem kynnt var á dögunum hefur gert með sér samstarfssáttmála um aðgerðir til að rétta af hallarekstur bæjarins. Gripið verður til róttækra sparnaðaraðgerða og er ein þeirra sú að draga á úr kostnaði við snjómokstur. Andri Teitsson er formaður umhverfis- og mannvirkjaráðs.

Seinka mokstri og fækka skiptum

„Það sem að við getum gert í snjómokstrinum er að til dæmis byrja aðeins seinna að moka þegar fer að snjóa. Moka einu sinni en ekki tvisvar, svona í sömu hríðinni og við ætlum að leggja áherslu á að moka strætóleiðir og göngustíga þannig að flestir eða allir munu eiga kost á því að komast til og frá vinnu eða skóla eftir þeim leiðum þó það sé ekki búið að moka íbúðargöturnar. En ég vil líka benda á það að COVID hefur kennt okkur að það þurfa ekki alveg allir, nauðsynlega að komast leiðar sinnar akkurat klukkan 8:00 alla daga. Það er sveigjanleiki hjá töluverðum hópum og við eigum að reyna að nota okkur það meira," segir Andri. 

Markmiðið að spara 30-50 milljónir

Allt stefnir í fordæmalausan hallarekstur Akureyrarbæjar og gæti halli aðalsjóðs bæjarins orðið allt að þrír milljarðar króna. Skert þjónusta við snjómokstur er einn liður í því að brúa þetta bil. 

„Á þessu ári erum við að verja sennilega 220 milljónum í snjómokstur og hálkuvarnir og við myndum gjarnan vilja reyna að þrjátíu til fimmtíu milljónir." 

Óðinn Svan Óðinsson
Síðast:
Þessi þáttur er í hlaðvarpi