Athugið þessi frétt er meira en mánaðargömul.

Heimahjúkrun ein forsenda þess að fólk búi lengur heima

Mynd með færslu
 Mynd: ?? - ruv.is
Heimahjúkrun er ein forsenda þess stefnumiðs íslenskra stjórnvalda að fólki verði gert mögulegt að búa sem lengst á eigin heimili þótt aldurinn færist yfir.

Þetta kemur fram í skýrslu félags- og barnamálaráðherra sem gerð var að beiðni nokkurra þingmanna. Áður hafði komið fram í svari heilbrigðisráðherra við fyrirspurn á Alþingi að heimahjúkrun væri forsenda þess að öldruðu fólki yrði þetta mögulegt.

Mikilvægt er talið að fólk geti búið sem lengst á eigin heimili. Ætlunin er að á Íslandi verði öldruðum gert kleift að búa sem lengst utan stofnana, með stuðningi frá ríki og sveitarfélögum.

Heimaþjónusta hefur verið veitt af hjúkrunarfræðingum og sjúkraliðum en jafnframt segir í skýrslunni að unnið sé að því að hægt verði að bjóða upp á sérhæfðari heimahjúkrun í stærri sveitarfélögum og byggðakjörnum.

Þjónustu af því tagi annist sérhæfðir hjúkrunarfræðingar, til að mynda á sviði líknar- og lífslokameðferðar. Svipað sé uppi á teningnum á hinum Norðurlöndunum, með ýmsum útfærslum þó.

Að því er fram kemur í skýrslu ráðherrans er hugmyndin að rjúfa einangrun þess fólks sem þarf á stuðningi við athafnir almenns lífs að halda, gefa langveiku fólki kost á að búa lengur á eigin heimili og auka hæfni þess til að bjarga sér sjálft í hversdagslífinu.

Þar segir jafnframt að sveitarfélög skuli veita eldri borgurum þjónustu sem búi á eigin heimili og þurfi aðstoð vegna fjölskylduaðstæðna, álags, veikinda eða fötlunar. Sveitarfélögin hafi þó heimild til að taka greiðslu fyrir þá þjónustu sína.