Banki greiðir milljarðasekt vegna peningaþvættis

24.09.2020 - 01:23
A Westpac bank ATM sign is posted on a wall in Sydney, Thursday, Sept. 24, 2020. Westpac, Australia's second-largest bank, agreed to pay a 1.3 billion Australian dollar ($919 million) fine for breaches of anti-money laundering and counterterrorism financing laws, the largest ever civil penalty in Australia, a financial crime regulator said. (AP Photo/Rick Rycroft)
 Mynd: AP
Ástralski bankinn Westpac samþykkti í morgun að að greiða 1,3 milljarða ástralíudala sekt, jafnvirði nærri 130 milljarða króna, vegna 23 milljóna brota á lögum um peningaþvætti. Peter King, framkvæmdastjóri Westpac, notaði tækifærið og baðst afsökunar á lögbrotum bankans.

Sektarupphæðin var ákveðin í samkomulagi við fjármálaeftirlit Ástralíu og bíður nú samþykkis dómstóls. Fjármálaeftirlitið segir sektina endurspegla alvarleika og umfang brotanna. Eftirlitið birti ásakanir gegn Westpac í nóvember í fyrra. Þar var bankinn sakaður um 23 milljónir brota gegn lögum um peningaþvætti og hryðjuverkastarfsemi, að sögn AFP fréttastofunnar. Alls er talið að jafnvirði sjö milljarða bandaríkjadala hafi farið í gegnum bankann, jafnvirði ríflega 970 milljarða króna.

Stjórnendur bankans eru meðal annars sakaðir um að hafa vísvitandi litið framhjá sönnunum sem sýndu að hluti peninganna var notaður til þess að fjármagna barnaþrælkun. Fjármálaeftirlitið segir bankanna hafa vitað af miklum fjölda smárra millifærslna til Suðaustur-Asíu frá árinu 2013 og verið greint sérstaklega frá áhættunni sem fylgdi einni greiðslulínunni í júní 2016. 

Þegar fjármálaeftirlitið birti ásakanirnar lét Brian Hartzer af störfum sem framkvæmdastjóri. King tók við, en hann gegndi áður stöðu fjármálastjóra. Stjórnarformaðurinn Lindsay Maxsted lét einnig af störfum. King segir bankann búinn að efla eftirlit með glæpsamlegum millifærslum og gripið til aðgerða til þess að breyta menningu, stjórnun og ábyrgð innan vinnustaðarins.

Róbert Jóhannsson
Fréttastofa RÚV
Síðast:
Þessi þáttur er í hlaðvarpi