Mynd: Shutterstock Shutterstock
Athugið þessi frétt er meira en 11 mánaða gömul.
Flugferð án áfangastaðar er nýjasta æðið
Sjö klukkustunda flugferð yfir óbyggðir Ástralíu og Kóralrifið mikla utan við austurströndina seldist upp á tíu mínútum.
Ástralska flugfélagið Qantas býður upp á þetta ferðalag og bætist við það í hóp flugfélaga, einkum í Asíu, sem bjóða upp á ferðalög án áfangastaðar. Þá er lagt upp frá flugvelli, flogið um í nokkra klukkutíma og lent aftur á sama velli.
Samtök flugrekenda á í Asíu og við Kyrrahaf kveða ferðatakmarkanir vegna kórónuveirufaraldursins hafa valdið hruni upp á ríflega 97 prósent í millilandaflugi til og frá svæðinu.
Margt fólk sem hefur yndi af ferðalögum saknar flugferðanna. Til að bregðast við því hafa flugfélög því brugðið á þetta ráð, sem ásamt því að gleðja flugfarþega heldur flugmönnum í þjálfun og getur bætt fjárhagsstöðu flugfélaganna.
Ferðalangar í flugferð Qantas sitja um borð í Boeing 787 þotu sem flogið er í lítilli hæð. Slíkar þotur eru yfirleitt notaðar til óralangra flugferða heimsálfa á milli. Út um gluggana geta farþegarnir notið þess að virða fyrir sér náttúru landsins, Uluru fjall. Kóralrifið mikla og hafnarsvæðið í Sidney áður en lent er aftur á Sidney flugvelli.
Miðarnir kosta sem nemur 80 til 380 þúsundum íslenskra króna, eftir því hvar í vélinni setið er. Reuters hefur eftir talskonu flugfélagsins að flugmiðar hafi sennilega aldrei selst jafn hratt í sögu félagsins.
Hún telur að fólk sakni ferðalaga og flugsins sjálfs og því verði án efa bætt við útsýnisferðum af þessu tagi þar til landamæri verða opnuð að nýju.
