Mynd: EPA - NTB Scanpix
Athugið þessi frétt er meira en mánaðargömul.
Breivik biður um reynslulausn
Norski hryðjuverkamaðurinn Anders Behring Breivik, sem varð 77 að bana í júlí árið 2011, hefur sótt um reynslulausn úr fangelsi. Jafnframt ætlar hann að lögsækja norska ríkið vegna aðbúnaðar í fangelsinu.
Lögmaður Breiviks, Oysten Storrvik, segir í samtali við Verdens Gang að hann hafi sent yfirvöldum ósk um reynslulausn. Breivik eigi rétt á að beiðnin sé tekin fyrir þegar hann hefur setið af sér lágmarksrefsingu, sem í hans tilviki er tíu ár. Þetta sé réttur allra fanga og hann vilji láta reyna á hann, hefur VG eftir Storrvik.
Storrvik segir að skjólstæðingur hans ætli einnig að sækja mál gegn ríkinu öðru sinni til þess að mótmæla því að vera langdvölum í einangrun. Hann gerði slíkt hið sama árið 2016 og sagði þá að aðbúnaður hans í fangelsinu væri brot á mannréttindasáttmála Evrópu.
Breivik var dæmdur í 21 árs fangelsi árið 2012, sem þá var þyngsti dómur í norskri réttarsögu. Dóminn má þyngja að vild. Hann kom fyrir sprengju í miðborg Óslóar sem varð átta að bana. Á meðan lögreglan sinnti því fór Breivik til Úteyjar þar sem ungliðar Verkamannaflokksins voru saman komnir. Hann dulbjó sig sem lögreglumaður og skaut 69 til bana á eynni.
Breiviki situr inni í fangelsinu á Skien í Noregi. Þar hefur hann aðgang að þremur klefum sem hver um sig er tíu fermetrar. Útsýni er úr klefunum og hann er með æfingaaðstöðu, getur spilað tölvuleiki og horft á sjónvarp.
Að sögn Verdens Gang vildi Lisbeth Kristine Røyneland, formaður samtaka aðstandenda fórnarlamba hryðjuverka Breiviks, ekki tjá sig um málið.
