Segir ekki þurfa að virkja til að rafvæða samgöngur

Mynd: RÚV / RÚV
Bjarni Bjarnason, forstjóri Orkuveitu Reykjavíkur, segir að næstu tíu árin þurfi hvorki að virkja sérstaklega á Íslandi til að rafmagnsvæða samgöngur né þurfi að styrkja flutningskerfi Landsnets sérstaklega.

Orkuveitan spái því að rafbílar verði orðnir 100 þúsund árið 2030. Bjarni segir að um 7,5-8 prósent af öllu rafmagni sem hægt sé að vinna árlega í landinu sé óselt. Það dugi til að knýja allan einkabílaflota landsins og vel það.  

„7,5 prósent myndu duga á tæplega 600 þúsund einkabíla. Við erum með 270 þúsund í landinu. En við erum að horfa á tímaramma líka sem er þannig að árið 2030, eftir tíu ár, að þá verðum við komin með um 100 þúsund bíla, ef spá okkar gengur eftir. Það er bara 1,5 prósent nú þegar erum við með 7,5 prósent laus og óseld,“ sagði Bjarni í Silfrinu í dag.

Bjarni benti á að orkufrekur iðnaður taki 80 prósent af raforkuframleiðslu landsins. Allt annað; heimilin, léttur iðnaður, fiskiðjan, ylrækt og landbúnaður taki tuttugu prósent. Stóriðjan og gagnaver hafi dregið úr raforkunotkun og dregið hafi úr almennri notkun líka, til dæmis vegna fækkunar ferðamanna en einnig vegna þess að raftæki eru sparneytnari. 

Ásrún Brynja Ingvarsdóttir
Fréttastofa RÚV
Síðast:
Þessi þáttur er í hlaðvarpi