Afganska sendinefndin baðst fyrir áður en hún hélt til Doha í Katar í dag. Mynd: EPA-EFE - Friðarnefnd afgönsku stjórnar
Athugið þessi frétt er meira en mánaðargömul.
Afgönsk stjórnvöld hóflega bjartsýn
Samningamenn afganskra stjórnvalda virtust í dag hóflega bjartsýnir um lausn erfiðra ágreiningsmála í friðarviðræðum við Talíbana. Friðarviðræðurnar hófust í Doha í Katar í gær.
Abdullah Abdullah, aðalsamningamaður stjórnvalda, bjóst við að Talíbanar biðu upp á vopnahlé í skiptum fyrir lausn fleiri fanga úr þeirra röðum.
Hann segir aðalmarkmiðið vera varanlegt vopnahlé um allt land en leiðin þangað sé mörkuð nokkrum mikilvægum áföngum, sem Talíbönum beri að taka þátt í.
Talíbanar telja að láti þeir af árásum sínum geri það samningsstöðu þeirra erfiðari. Á meðan viðræðurnar fóru fram í dag féll á annan tug í atlögum þeirra víðsvegar um landið.
Abdullah segir það viðhorf Talíbana byggja á hreinum misskilningi af þeirra hálfu. Friðarviðræðurnar geti orðið flóknar og vandasamar enda falla tugir í átökum í Afghanistan á hverjum degi. Efnahagur landsins er í rúst og fjöldi fólks hefur orðið fátækt að bráð.
