Athugið þessi frétt er meira en 11 mánaða gömul.

Þetta eru höfundar Áramótaskaupsins í ár

Höundar áramótaskaupsins 2020: Höfundar Áramótaskaupsins í ár eru Hugleikur Dagsson, Lóa Hjálmtýsdóttir, Vala Kristín Eiríksdóttir, Þorsteinn Guðmundsson, Bragi Valdimar Skúlason og Katla Margrét Þorgeirsdóttir. Reynir Lyngdal leikstýrir Skaupinu líkt og í fyrra. Tökur hefjast í nóvember og Republik sér um framleiðsluna.
 Mynd: RÚV

Þetta eru höfundar Áramótaskaupsins í ár

04.09.2020 - 11:24

Höfundar

Höfundar Áramótaskaupsins í ár eru Hugleikur Dagsson, Lóa Hjálmtýsdóttir, Vala Kristín Eiríksdóttir, Þorsteinn Guðmundsson, Bragi Valdimar Skúlason og Katla Margrét Þorgeirsdóttir. Reynir Lyngdal leikstýrir Skaupinu líkt og í fyrra. Tökur hefjast í nóvember og Republik sér um framleiðsluna.

„Að gera Skaup er ein skemmtilegasta vinna sem hægt er að hugsa sér sem leikstjóri og höfundur. Að skoða og greina samtímann í gegnum grín og hafa tækifæri til að vinna með fyndnasta fólki á landinu eru forréttindi. Þegar mér bauðst að gera Skaupið í ár eftir að hafa gert, að því er mér finnst, vel heppnað skaup í fyrra þurfti ég ekki að hugsa mig lengi um,” segir Reynir Lyngdal. „Erfiðleikar vegna kórónuveirufaraldursins og afleiðinga hans á allt samfélagið kalla á nærgætni og efnistök sem gleðja og hlýja. Við viljum vekja von. Þó er engin hræðsla við að gera gagnrýnið grín þegar það á við á sama tíma og virðing fyrir fólki er í hávegum höfð. Vonandi tekst okkur sem að þessu vinnum að gera árinu góð skil og skemmta landanum í leiðinni.”

Skarphéðinn Guðmundsson, dagskrárstjóri sjónvarps, segir af tilefninu: 

 

„Þegar Reynir lýsti yfir áhuga á að endurtaka leikinn og gera annað Skaup þá vakti það strax áhuga okkar. Einfaldlega vegna þess að síðasta Skaup var að okkar mati alveg afgerandi vel heppnað í nær alla staði og af viðbrögðum að dæma virðist þorri þjóðarinnar hafa verið á sama máli. Það sem stóð þar upp úr og gladdi okkur sérstaklega var hversu vel tókst upp við að ná þeirri næsta ómögulega breiðu skírskotun sem Skaupið þarf að hafa og þá einkum með tilliti til vals á viðfangsefni, hins breiða aldurshóps sem horfir á Skaupið og svo auðvitað smekks á gríni. Svo gerði það útslagið þegar Reynir og félagar hjá Republik lögðu til þetta geggjaða skrifarateymi sem samanstendur af nokkrum af okkar reyndustu grínhöfundum í bland við yngri sem eru tvímælalaust með þeim okkar allra efnilegustu. Svo spilar óneitanlega inn í að til umfjöllunar verður afar sérstakt ár, hreint fordæmalaust nánast í einu og öllu, og þá er eins gott að þeir sem tækli það kunni til verka."