Svandís Svavarsdóttir, heilbrigðisráðherra. Mynd: Bragi Valgeirsson - RÚV
Athugið þessi frétt er meira en 6 mánaða gömul.
200 mega koma saman og eins metra regla tekur gildi
Svandís Svavarsdóttir heilbrigðisráðherra hefur gefið út auglýsingu um að rýmri samkomutakmarkanir taki gildi mánudaginn 7. september. Þá mega koma saman 200 í stað 100 og tveggja metra nálægðarreglu verður breytt í eins metra nálægðarreglu. Hingað til hefur eins metra nálægðarregla gilt í framhalds- og háskólum. Breytingarnar eru í samræmi við tillögur sem Þórólfur Guðnason sóttvarnarlæknir sendi Svandísi á miðvikudag.
Þórólfur sagði á upplýsingafundi almannavarna í gær að eins metra fjarlægð milli fólks minnkaði líkur á smiti fimmfalt.
Þá breytist hámarksfjöldi á sund- og baðstöðum úr því að vera helmingur af leyfilegum hámarksfjölda í 75 prósent. Íþróttir, sviðslistir og önnur menningarstarfsemi getur farið fram þrátt fyrir eins metra regluna því þar verða snertingar heimilaðar. Engin breyting verður gerð á opnunartímum vínveitingastaða, þeir mega áfram vera opnir til klukkan 23:00.
