Athugið þessi frétt er meira en 9 mánaða gömul.

Eltihrellar í allt að fjögurra ára fangelsi

02.09.2020 - 06:56
Mynd með færslu
 Mynd:
Heimilt verður að dæma eltihrella í allt að fjögurra ára fangelsi, verði frumvarp Áslaugar Örnu Sigurbjörnsdóttur, dómsmálaráðherra, að lögum. Hún segir að núgildandi lög séu ekki nægileg vernd við umsáturseinelti. 

Frumvarpið er til umsagnar í samráðsgátt stjórnvalda og í því er lagt til að nýju refsiávæði verði bætt við almenn hegningarlög. Samkvæmt drögum frumvarpsins skal hver sá sem endurtekið hótar, eltir, fylgist með, setur sig í samband við eða með öðrum sambærilegum hætti situr um aðra manneskju og háttsemin er til þess fallin að valda hræðslu eða kvíða, sæta sektum eða fangelsi í allt að fjögur ár. 

Dómsmálaráðherra segir að nálgunarbann sé ekki nægjanleg vernd við umsáturseinelti, sem eigi sér margar birtingarmyndir. „Það er ekki alltaf þannig að aðilar þekkist eða háttsemi sem varðar beint við þau hegningarlagaákvæði sem við erum með í dag, eins og með hótanir og ofbeldi. Háttsemin getur verið margvísleg og við höfum séð það í dómaframkvæmd að ákvæðin sem eru fyrir í dag hafa ekki nýst sem nægileg vernd til að vernda þann rétt að fólk geti gengið um í samfélaginu óáreitt,“ segir Áslaug Arna. 

Áslaug Arna Sigurbjörnsdóttir á upplýsingafundi 14.08.2020
Áslaug Arna Sigurbjörnsdóttir, dómsmálaráðherra.  Mynd: RÚV - Skjáskot

Í frumvarpsdrögunum segir að umsáturseinelti geti bæði beinst að manneskju sem gerandinn sé í tengslum við, sem og að bláókunnugum. Reynslan hafi sýnt að þeir sem hafi í frammi umsáturseinelti beini því ekki endilega eingöngu að tilteknum manni heldur til viðbótar að öðrum einstaklingum sem tengjast honum, eins og fjölskyldu, vinum eða samstarfsmönnum. Slíkt geti leitt af sér hræðslutilfinningu, öryggisleysi og ótta um að missa stjórn á aðstæðum.