Athugið þessi frétt er meira en 8 mánaða gömul.

Aflýsa fjölda flugferða til og frá landinu

02.09.2020 - 08:28
Mynd með færslu
 Mynd: RÚV - Grímur Jón Sigurðsson - RÚV
Stórum hluta flugferða sem fyrirhugaðar voru til og frá landinu í dag og á morgun hefur verið aflýst. Ásdís Ýr Pétursdóttir, upplýsingafulltrúi Icelandair, segir að nú vinni félagið að því að laga framboð að eftirspurn.

7 af 16 auglýstum brottförum frá Keflavíkurflugvelli í dag hefur verið aflýst og 7 af 15 komuferðum. Það sama er uppi á teningnum á morgun; 6 af 17 komuferðum hefur verið aflýst og 6 af 16 brottförum. Langflestar þeirra flugferða sem hefur verið aflýst eru á vegum Icelandair.

Á föstudaginn hefur engum flugum enn verið aflýst enda segir Ásdís Ýr í samtali við fréttastofu að ákvarðanir um flugframboð séu gjarnan teknar með litlum fyrirvara vegna þess hversu hratt eftirspurnin sveiflast. „Við erum búin að vera að gera þetta síðan í mars, að aðlaga framboðið að eftirspurninni,“ segir hún. Staðan sé metin nokkra daga fram í tímann og það gangi vel að halda sveigjanleika í framboði.

Aðspurð segir hún að sem fyrr hafi farþegar þrjá valkosti þegar flugferðum er aflýst; þeir geti fundið nýja dagsetningu, fengið inneign eða fengið endurgreiðslu. Hingað til hafi meirihluti farþega kosið að fá inneign eða fært flug og um það bil þriðjungur óskað eftir endurgreiðslu.