Mynd: Vegagerðin
Öllum 68 starfsmönnum Herjólfs ohf. sagt upp
Öllum 68 starfsmönnum Herjólfs ohf. hefur verið sagt upp störfum. Guðbjartur Ellert Jónsson, forstjóri Herjólfs, segir uppsagnirnar varúðarráðstafanir því stjórn félagsins telur óábyrgt að halda út í frekari óvissu með rekstur félagsins að öllu óbreyttu.
Fundað hafi verið um aðgerðir til að reyna að takmarka tjón félagsins í ágúst og hófst ferli að hópuppsögnum allra starfsmanna félagsins í samræmi við lög um hópuppsagnir þann 20. ágúst. Starfsmönnum var tilkynnt um uppsagnirnar á fundi í dag.
Hann segir að gera megi ráð fyrir að halli af rekstri félagsins í árslok verið um 400 milljónir króna. Stjórn félagsins telur að ekki hafi verið staðið fyllilega við gerðan þjónustusamning við ríkið um siglingar milli Eyja og lands og hefur gert kröfu á ríkið sem nemur þeirri upphæð.
„Það sem gerir útslagið eru áhrifin af kórónuveirufaraldirnum og þær sértekjur sem við þurfum til að geta staðið undir reksturinum á þeim forsendum,“ segir Guðbjartur. Kjaradeila Herjólfs við hluta starfsmanna er óleyst hjá ríkissáttasemjara.
Vinna við endurskoðun á frekari fjárframlögum og á rekstri félagsins er í gangi þó engin niðurstaða liggi fyrir. Þeirri vinnu verður hraðað eins og kostur er, segir í fréttatilkynningu.
