Athugið þessi frétt er meira en 9 mánaða gömul.

Mjög ásættanleg tilboð í uppsteypu meðferðarkjarna

Mynd með færslu
 Mynd: Nýr Landspítali/NLSH ohf. - Aðsend mynd
Verkatakafyrirtækið Eykt átti lægsta tilboð í uppsteypu meðferðarkjarna nýs Landspítala eða tæp 83% af kostnaðaráætlun. Næst lægsta tilboð áttu ítalska verktakafyrirtækið Rizzani De Eccher ásamt Þingvangi, rétt rúmlega 83%.

Útboð um uppsteypu á meðferðakjarna nýja Landspítalans frá þeim  verktökum sem stóðust forval voru opnuð á ellefta tímanum í morgun. Forvalið var opið og auglýst innan Evrópusambandsins. 

Nú tekur við yfirferð á öllu einingarverði og magntölum og í kjölfarið hefjast samningaviðræður. Búist er við að framkvæmdir hefjist eftir um þrjá mánuði. Gunnar Svavarsson framkvæmdastjóri Nýs Landsspítala ohf. segir tilboðin ásættanleg.

Tilboð bárust frá fjórum verktökum; Eykt, Íslenskum aðalverktökum, Ístaki, Rizzani De Eccher ásamt Þingvangi. Opið útboð vegna veitukerfis og vinnubúða starfsfólks við byggingu meðferðarkjarnans er opið til 3. september næstkomandi.

Bygging sjúkrahússins er eitt viðamesta byggingaverkefni síðari ára á Íslandi. Meðferðarkjarninn er stærsta bygging Hringbrautarverkefnisins. Húsið er um 70 þúsund fermetrar.

„Jarðvegsframkvæmdir við grunn hússins hafa gengið vel og nú hefst nýr kafli sem er uppsteypa á þessu stóra húsi," segir Gunnar Svavarsson.

Undir sjúkrahústorginu verður bílakjallari fyrir 200 bíla  auk húss með  550 bílastæðum þar sem varaaflstöð fyrir spítalann er sömuleiðis fyrirkomið.

Búist er við að uppsteypa meðferðarkjarnans taki tæp þrjú ár ár en ætlunin er að húsið verði tekið í notkun 2025 eða 2026.

Að sögn Gunnars Svavarssonar hafa verið gerðar sambærilegar kröfur um aðbúnað í meðferðarkjarnanum og í nýjum háskólasjúkrahúsum í nágrannalöndunum.

„Meðferðarkjarninn er hugsaður út frá starfsemi bráða- og háskólasjúkrahúss, með áherslu á einfalt og skýrt fyrirkomulag ásamt greiðum leiðum milli starfseininga."

Á vef Hringbrautarverkefnisins kemur fram að starfsemi Landspítala fari nú fram í um hundrað húsum á 17 stöðum á höfuðborgarsvæðinu.

 

markusthth's picture
Markús Þ. Þórhallsson
Fréttastofa RÚV