Sýni tekin úr vegfarendum í Hwasun í Suður-Kóreu. Mynd: EPA-EFE - YNA
Athugið þessi frétt er meira en 6 mánaða gömul.
Smituðum fjölgar á ný í Suður-Kóreu
Ríflega 440 greindust með kórónuveirusmit í Suður-Kóreu síðasta sólarhring samkvæmt tölum sem heilbrigðisráðuneyti landsins birti í nótt. Þetta er í fyrsta skipti frá 7. mars sem fjöldi greindra smita í landinu fer yfir 400.
Þinghúsinu í Seoul var lokað í gær eftir að fréttamaður sem var að fjalla um Lýðræðisflokkinn, stjórnarflokkinn í Suður-Kóreu, greindist með kórónuveirusmit.
Fleiri en 50 manns, þar á meðal 14 háttsettir fulltrúar Lýðræðisflokksins, þurftu í kjölfarið að fara í sóttkví og skimun. Þá segir fréttastofan Yonhap að loka hafi þurft opinberum stofnunum vegna kórónuveirusmita.
Búist er við að reglur vegna farsóttarinnar verði hertar á ný í Suður-Kóreu og að fjöldi þeirra sem megi safnast saman í einu fari niður í tíu. Einnig að samkomu- og kaffihúsum kunni að verða lokað.
Í morgun hvatti heilbrigðisráðherra landsins vinnuveitendur til að leyfa starfsmönnum að vinna eins mikið heima og mögulegt væri.
