Andlitsgrímur skylda á almannafæri í Seoul

epaselect epa08444120 A man wearing a face mask walks past Seoul city hall in Seoul, South Korea, 26 May 2020. Millions of students throughout the country are expected to return to school on 27 May.  EPA-EFE/JEON HEON-KYUN
 Mynd: EPA-EFE - EPA
Nú ber fólki skylda að bera andlitsgrímur almannafæri í Seoul, höfuðborg Suður-Kóreu.

Að sögn Reuters-fréttastofunnar á þetta við jafnt innan- sem utandyra en útbreiðsla kórónuveirunnar hefur verið mjög mikil þar í landi undanfarið.

Eingöngu er leyfilegt að taka grímurnar niður meðan etið er eða drukkið. Í maí síðastliðnum var sett kvöð um grímunotkun í almenningsfarartækjum og leigubílum í borginni.

Yfirvöld telja nú að enn þurfi að herða reglur um samgang milli fólks. Í gær, sunnudag greindust 266 ný kórónuveirutilfelli í Suður-Kóreu en á laugardag voru þau 397.

Næturklúbbum í landinu hefur verið gert að loka, eins mega veitingastaðir ekki bjóða upp á hlaðborð og netkaffihúsum hefur verið lokað. Það sama á við um kirkjur í landinu.

Vegna hinnar miklu fjölgunar tilfella munu stjórnvöld í Suður-Kóreu nú vera að íhuga að herða enn á reglum með því að fyrirskipa lokun skóla og ýmissa fyrirtækja.

markusthth's picture
Markús Þ. Þórhallsson
Fréttastofa RÚV
Síðast:
Þessi þáttur er í hlaðvarpi