Mynd úr safni. Mynd:
Athugið þessi frétt er meira en 8 mánaða gömul.
Leggur til rekstrarleyfi fyrir tvöfalt stærra landeldi
Matvælastofnun hefur unnið tillögu að rekstrarleyfi fyrir Matorku ehf. vegna fiskeldis vestan Grindavíkur. Um er að ræða nýtt rekstrarleyfi fyrir landeldi, fyrir 6.000 tonna hámarkslífmassa vegna matfiskeldis á laxi, bleikju og regnbogasilungi.
Áður var fyrirtækið með rekstrarleyfi fyrir 3.000 tonna framleiðslu á laxi, bleikju, regnbogasilungi og borra. Matorka starfrækir fiskeldi í Húsatóftum í Grindavík, bæði í eldri stöð með 200 tonna leyfi og í nýrri stöð sem er með 3.000 tonna leyfi. Sú stöð er í uppbyggingu og verður tvöfölduð. Í matsskýrslu Matorku kemur fram að landeldisstöðin bjóði upp á allt að 75% endurnýtingu á vatni með möguleika á allt að 80% hreinsun á lífrænum úrgangi.
Matvælastofnun auglýsir frest til þess að skila inn skriflegum athugasemdum til 18. september í tilkynningu.
Í niðurstöðum álits Skipulagsstofnunar um mat á umhverfisáhrifum kemur fram að Skipulagsstofnun telur að við leyfisveitingar þurfi að setja skilyrði um vöktun grunnvatns og viðbrögð við áhrifum vatnstöku á grunnvatnsborð.
