Dúxaði í Versló og skrifaði lífsstílsbók fyrir tvítugt

Mynd: Guðjón Ari Logason

Dúxaði í Versló og skrifaði lífsstílsbók fyrir tvítugt

19.08.2020 - 14:31

Helga Margrét Höskuldsdóttir

dagskrárgerðarmaður

Guðjón Ari Logason er tvítugur og gaf nýlega út bókina Náðu árangri - í námi og lífi. Í bókinni fjallar hann um það sem hefur hjálpað honum að ná árangri í námi og á öðrum vettvangi en hann var dúx Verslunarskóla Íslands vorið 2019 og hefur spilað körfubolta með meistaraflokki Fjölnis.

Guðjón hafði ekki leitt hugann að körfubolta fyrr en sumarið 2011 þegar hann sá kvikmyndina Glory Road. Myndin fjallar um háskólalið í Texas Western háskólanum í El Paso árið 1966 og gerist þegar mikil ólga er í samfélaginu hvað varðar kynþáttahatur og jafnrétti. Guðjón varð heillaður af íþróttinni eftir að hafa séð myndina, fór að æfa körfubolta með Fjölni og hefur gert síðan þá.

Stefnan var svo alltaf að fara til Bandaríkjanna og spila með háskólaliði eins og í myndinni. Þegar kom svo hins vegar að því að fara að hafa samskipti við skóla úti og taka ákvörðun segist Guðjón hafa farið að opna augun og víkka sjóndeildarhringinn.

„Það myndaðist þarna ákveðin togstreita af því ég var búinn að stefna að því sama í mörg ár. Svo varð það eiginlega yfirþyrmandi að vera kominn á fremsta hlunn með að ná þessu markmiði og ég fór að efast um að þetta væri eitthvað sem ég virkilega vildi.“

Hann ákvað í staðinn að taka sér pásu frá námi en ætlar að byrja í sálfræði í Háskóla Íslands í haust og segir það lán í óláni að hann hafi ekki farið út en hann væri ekki til í að hafa verið í miðju námi erlendis þegar Covid-19 brast á. „Eftir á að hyggja var þessi efi af því góða, ef hann hefði ekki komið upp væri ég ekki búinn að gefa út bók og stofna fyrirtæki,“ bætir Guðjón við.

Í bókinni fer Guðjón yfir þau ráð sem hann hefur nýtt sér til að ná árangri í gegnum tíðina, bæði í skóla og eins í körfuboltanum og í atvinnulífinu. Hann segir að þrátt fyrir að markhópur bókarinnar sé 12-25 ára geti allir nýtt sér bókina, sama hversu gamlir þeir séu. „Þó fólk vilji kannski ekki endilega fá ráð frá 20 ára strák,“ bætir hann við.

Mynd: Guðjón Ari Logason

Nú er nám í grunn-, framhalds- og háskólum að hefjast víðast hvar um landið en breyttur veruleiki blasir við mörgum nemendum þar sem sóttvarnareglur koma að talsverðu leyti í veg fyrir hefðbundna kennslu. Margir framhaldsskólar munu kenna að miklum hluta í fjarnámi, skipta nemendum upp í hópa og í háskólum landsins verður rafræn kennsla í talsverðu magni.

Sjá einnig: Skrítið að vera í meters fjarlægð - kynnast á netinu

Guðjón segir að það eigi ekki að hafa mikil áhrif á nemendur að eitthvað sé kennt í fjarnámi. „Ef þú ert að læra það sem þig langar að læra og það sem þú hefur áhuga á þá skiptir það engu máli hvort það sé í fjarnámi eða ekki.“ Hann segir hins vegar að auðvitað sé ekki allt sem maður læri endilega skemmtilegt og stundum þurfi að búa til ástæður, áhuga og tilgang hjá sjálfum sér fyrir því að leggja sig fram. „Ef maður hefur tilgang og ástríðu fyrir því sem maður gerir þá kemur allt hitt að jafnaði,“ bætir hann við.

Maður eigi hins vegar að læra fyrir sjálfan sig og engan annan, ekki foreldra, vini eða öryggið sem fylgi mögulega þeirri námsgrein sem maður hefur valið sér. „Ég hefði aldrei dúxað ef ég hefði verið á listfræðibraut eða eðlisfræðibraut. Það er oft talað um að ákveðnar brautir í framhaldsskóla séu besti grunnurinn fyrir framtíðina en það er brautin sem þú hefur mestan áhuga á sem er besti grunnurinn.“

Guðjón stefnir á að halda áfram að reka fyrirtækið sitt, GodFyre, í vetur og stefnir á Bandaríkin haustið 2021. Markmiðið með fyrirtækinu er að hafa þau áhrif að sem flestir fylgi hjartanu. „Ef ég er hamingjusamur skiptir ekki máli hvað öðrum finnst um það sem ég er að gera. Það er hægt að gera það sem þú vilt og vinna við það sem þú vilt þegar þú ert tvítugur, en það þarf auðvitað að leggja inn vinnuna,“ segir hann að lokum.