Olíutankar fluttir frá Sauðárkróki á Vestfirði

14.08.2020 - 15:46
Mynd með færslu
 Mynd: Feykir.is - RÚV
Búið er að fjarlægja olíutanka Olíudreifingar, sem staðsettir hafa verið á Sauðárkróki. Þeir verða nú fluttir með norska flutningaskipinu Rotsund á Vestfirði þar sem þeirra bíður annað hlutverk.

Tankarnir fá nýtt heimili á Vestfjörðum

Það er staðarmiðillin Feykir.is sem greinir frá þessu en þar kemur fram að íslenska fyrirtækið Arctic Protein hafi keypt tankana. Þeir verði nú fluttir á Patreksfjörð, Bíldudal og Þingeyri og nýttir sem meltugeymar. Fyrirtækið sérhæfir sig í að veita laxeldisfyrirtækjum, útgerðum og öðrum fiskfyrirtækjum þjónustu. 

Stórt verkefni

Flutningurinn var afar umfangsmikill en til þurfti hundrað tonna krana frá Kranabílum Norðurlands sem hífði tankana á bíla. Þá sá Steypustöð Skagafjarðar um að flytja þá á bryggjuna. 

„Maður á eftir að venjast því að sjá höfnina svona“

„Við byrjuðum rétt eftir eitt og búið var að koma þeim á sinn stað um níuleytið um kvöldið. Okkar hlutur var að setja festingar á og tæma lagnir þannig að hægt væri að ganga að þessu verki. Maður á eftir að venjast því að sjá höfnina svona en það eru alltaf breytingar,“ sagði Páll Sighvatsson, forstöðumaður Vélaverkstæðis KS í samtali við Feyki en fyrirtækið sá um að undirbúa tankana fyrir flutninginn.

Feykir.is
Óðinn Svan Óðinsson
Síðast:
Þessi þáttur er í hlaðvarpi