Handtekin í Hvíta-Rússlandi greina frá miklu ofbeldi

Mótmælin brutust út á sunnudag í kjölfar nýafstaðinna forsetakosninga en niðurstaða þeirra er dregin mjög í efa.

Einn þeirra handteknu lýsir í langri Facebook-færslu atferli lögreglumanna sem hann telur, auk innlendra, vera rússneska sérsveitarmenn. Hann greinir frá hörkulegri framgöngu lögreglumanna íklæddum bardagaklæðnaði sem báru þungar kylfur og beindu vélbyssum að mótmælendum með hrópum og köllum.

Höggin dundu

Fólk var fellt til jarðar og látið krjúpa eða liggja meðan höggin voru látin dynja á því. Barsmíðarnar héldu áfram uns fólk missti meðvitund, og jafnvel lengur. Fjölmargir liggja á sjúkrahúsi með skotsár, skurði og brotin bein. Eftir handtöku var fjölda fólks troðið inn í lögreglubíla, svo mörgum að erfitt varð um andardrátt.

Hann lýsir hvernig símar voru teknir af fólki og þeir brotnir, hvernig stigið var á háls astmaveikum manni og konum hótað nauðgun. „Við erum í einangrunarbúðum þar sem fólk er pyntað,“ segir í Facebook-færslunni.

Þegar maðurinn sjálfur var handtekinn segir hann lögreglumenn hafa troðið handsprengju ofan í buxur hans og hlaupið á brott með þeim orðum að dauði hans yrði skráður af völdum óþekkts sprengiefnis.

BBC hefur rætt við allmarga, þar á meðal táninga, sem segjast hafa mátt þola barsmíðar og annað ofbeldi. Viðmælendur segjast ekkert skilja í ofbeldinu. Natalya Kochanova, forseti hvít-rússneska þingsins, segir forsetann hafa fyrirskipað rannsókn á fjöldahandtökunum og aðstoðarinnanríkisráðherrann Alexander Barsukov þvertekur fyrir að handteknir hafi verið beittir ofbeldi.

Um 6.700 hafa verið handtekin í mótmælunum í Hvíta-Rússlandi, minnst tvö eru látin og fjöldi fólks hefur hlotið áverka.