Athugið þessi frétt er meira en mánaðargömul.

Dýpsta kreppa sögunnar í Bretlandi samkvæmt hagtölum

12.08.2020 - 09:10
epa08272461 British Prime Minister Boris Johnson attends a panel event and reception to mark International Women's Day in 10 Downing Street, Central London, Britain, 05 March 2020.  EPA-EFE/WILL OLIVER / POOL
 Mynd: EPA-EFE - EPA
Dýpsta efnahagslægð sögunnar er nú í Bretlandi, en samkvæmt hagstofunni þar í landi minnkaði verg landsframleiðsla um rúmlega fimmtung í öðrum ársfjórðungi. Þetta er jafnframt fyrsta efnahagslægðin í landinu í ellefu ár.

Sé mið tekið af stöðunni við árslok í fyrra hefur landsframleiðslan hnignað um 22,1 prósent. Að sögn hagstofunnar virðist þó aðeins vera að rofa til, þar sem framleiðsla hefur aukist lítillega eftir að stjórnvöld afléttu hömlum vegna heimsfaraldursins í júní.

Þá er sleginn sá varnagli varðandi fyrri tvo ársfjórðunga þessa árs vegna erfiðleika stofnunarinnar við að afla gagna frá stjórnvöldum sökum faraldursins.

Stærsta ástæða lægðarinnar er hrun í einkaneyslu. Almenningur eyddi nærri fjórðungi minna á öðrum ársfjórðungi heldur en þeim fyrsta á þessu ári.