Mynd: Veitur
Loka fyrir heita vatnið í 30 tíma í næstu viku
Skrúfað verður fyrir heitavatnslagnir á afmörkuðum svæðum á höfuðborgarsvæðinu aðfaranótt þriðjudagsins í næstu viku og ekki opnað fyrir þær aftur fyrr en miðvikudagsmorguninn eftir. Þetta kemur fram í tilkynningu frá Veitum.
Gera má ráð fyrir algjöru heitavatnsleysi á meðan lokuninni stendur á eftirtöldum svæðum:
- Allur Hafnarfjörður,
- Urriðaholt, Suðurhraun og Lundir í Garðabæ
- Nær allar efri byggðir Kópavogs
- Norðlingaholt í Reykjavík
Heita vatnið verður tekið af klukkan 2 aðfaranótt þriðjudagsins 18. ágúst og því hleypt aftur á klukkan 9 miðvikudagsmorguninn 19. ágúst.
Heita vatnið er tekið af því verið er að fjölga heimilum sem fá heitt vatn frá virkjunum á Hellisheiði og á Nesjavöllum. Til þess að tengja heimili inn á æðar frá þessum virkjunum þarf að stöðva rennsli og tæma eina af megin flutningsleiðum heita vatnsins á höfuðborgarsvæðinu.
Heitavatnsnotkun hefur aukist á síðustu árum meðal annars vegna fjölgunar íbúa og þéttingu byggðar. Álag á jarðhitageyminn sem fæðir borholur á lághitasvæðinum í Reykjavík og Mosfellsbæ hefur aukist við þessa fjölgun íbúa og við því verður að bregðast.
Með því að tengja heimilin við virkjanir á Hellisheiði og Nesjavöllum er hægt að framlengja líf lághitasvæðisins til langrar framtíðar, segir í tilkynningu Veitna.
