Mynd: EPA-EFE - CIVIL DEFENSE
Athugið þessi frétt er meira en mánaðargömul.
Að minnsta kosti 17 týndu lífi í flugslysi á Indlandi
Að minnsta kosti 17 eru látin og fleiri en hundrað slasaðir eftir að farþegavél Air India Express hafnaði utan flugbrautar í borginni Kozhikode í suðurhluta Indlands í dag. Vélin flutti farþega sem höfðu orðið strandaglópar fjarri heimahögunum vegna kórónuveirufaraldursins.
Tæplega 200 voru í vélinni. Þar á meðal voru tíu ungabörn. Mikil rigning var á flugvellinum þegar atvikið varð sem gerði það að verkum að hætt var við fyrirhugaða lendingu.
Flugmaðurinn breytti um stefnu og reyndi að nálgast flugbrautina úr gagnstæðri átt með þeim afleiðingum að flugvélin hafnaði utan brautarinnar og fór í tvennt. Ekki er þó fyllilega ljóst hvað olli slysinu en einhverjir fjölmiðlar hafa greint frá því að það megi rekja til bilunar í lendingarbúnaði vélarinnar.
Slysið er það versta á Indlandi frá árinu 2010. Þá hafnaði vél sama flugfélags utan brautar á flugvellinum í Mangalore og rann niður brekku. 158 létust í slysinu.
