Tvö innanlandssmit í Færeyjum

04.08.2020 - 12:43
epa06016625 The harbour of the country's capital Torshavn, Faroe Islands, 08 June 2017.  EPA/GEORGIOS KEFALAS
 Mynd: EPA - KEYSTONE
Tvö ný kórónuveirusmit hafa nú greinst í Færeyjum. Þetta staðfestir Lars Fodgaard Møller, landlæknir Færeyja, í samtali við færeyska ríkisútvarpið Kringvarpið. Báðir hinna smituðu tóku þátt í Ólafsvöku, sem haldin var hátíðleg síðustu helgina í júlí , en tengjast ekki að öðru leiti.

Kringvarpið segir einn til viðbótar hafa sem einnig tók þátt í Ólafsvöku hafa greinst með COVID-19, sá einstaklingur er hins vegar ekki lengur í Færeyjum heldur er hann farin aftur til Danmerkur.

Kringvarpið hefur eftir heilbrigðisyfirvöldum að ekki sé öruggt að sá sem kominn er til Danmerkur hafi smitast í Færeyjum, en öruggt sé að um innanlandssmit sé að ræða í hinum tveimur tilfellunum.

Møller hvetur Færeyinga til að taka fréttunum af alvöru. Staðan nú sé áhyggjuefni. Taka þurfi málin föstum tökum og leggja þurfi mikla vinnu í að rekja smitin.

„Ef við tökum okkur ekki taki núna er veruleg hætta á að smitin festi sig í sessi í Færeyjum,“ segir hann. „Það sem veldur áhyggjum er  að hér er talað um  þrjú sjálfstæð smit.“

Boðað hefur verið til fundar hjá ríkisstjórn landsins og sóttvarnarnefndinni vegna málsins.

Anna Sigríður Einarsdóttir
Síðast:
Þessi þáttur er í hlaðvarpi