Mynd: EPA-EFE - EPA
Athugið þessi frétt er meira en mánaðargömul.
Segja framferði Bandaríkjanna hreint og klárt einelti
Kínversk stjórnvöld segja að framferði þeirra bandarísku, þegar kemur að appinu Tik Tok, sé hreinlega einelti. Þetta kom fram í máli Wang Wenbin, talsmanns kínverska utanríkisráðuneytisins, á upplýsingafundi í dag. Donald Trump, Bandaríkjaforseti, gaf Tik Tok í gær sex vikur til að selja starfsemi sína í Bandaríkjunum til fyrirtækis þar í landi.
„Þetta gengur gegn öllum grunvallarreglum markaðarins og eins gegn reglum Alþjóða viðskiptamálastofnunarinnar um gagnsæi og bann við mismunun,“ sagði talsmaður kínverska utanríkisráðuneytisins í dag.
Trump hafði áður hótað að banna smáforritið í Bandaríkjunum vegna mögulegs öryggisleka og meintra njósna Kínastjórnar í gegnum það. Utanríkisráðherra Bandaríkjanna, Mike Pompeo, hefur lýst sig sammála þessum fyrirtætlunum Trump. Rannsókn á Tik Tok er í gangi í Bandaríkjunum á grundvelli öryggishagsmuna ríkisins. Ástæðan sem gefin hefur verið er sú að í appinu er persónuupplýsingum safnað og samkvæmt reglum í Kína ber fyrirtækinu að afhenda þær kínverska ríkinu, óski það eftir því.
Wang sagði á fundinum í dag að bandarísk yfirvöld hafi ekki sýnt fram á neinar sannanir þess efnis að Tik Tok ógni öryggi Bandaríkjanna. Einfaldlega sé verið að beita þessum rökum, um ógn við öryggi, í pólitískum tilgangi til að kúga erlent fyrirtæki.
Microsoft hefur verið í viðræðum við kínverska fyrirtækið ByteDance, sem á Tik Tok, um kaup á starfseminni í Bandaríkjunum.
