KSÍ fundar með yfirvöldum eftir helgi

Mynd með færslu
 Mynd: Mummi Lú - RÚV

KSÍ fundar með yfirvöldum eftir helgi

01.08.2020 - 15:30
Fulltrúar Knattspyrnusambands Íslands munu funda með yfirvöldum eftir helgi varðandi framhald Íslandsmóta í fótbolta. Hlé var gert á keppni og æfingum í íþróttum með snertingu fram til 13. ágúst á föstudag.

Hertar reglur vegna aukningar í COVID-19 smitum hér á landi voru kynntar á fimmtudag og var öllum fótboltaleikjum frá og með gærdeginum til 13. ágúst frestað vegna þeirra. KSÍ hefur ítrekað til aðildarfélaga sinna að engar æfingar fari fram í elstu aldurflokkunum tveimur, 2. flokki og meistaraflokki, fyrr en 13. ágúst. Málefni 3. flokks verða hins vegar tekin sérstaklega til skoðunar samkvæmt tilkynningu sambandsins á vef sínum.

KSÍ mun funda með yfirvöldum strax eftir helgi og mun stjórn sambandsins ráða ráðum sínum í kjölfarið.

Óvissa ríkir um fyrirkomulag og framhald Íslandsmóta í fótbolta hér á landi en þegar hafa leikir raskast vegna COVID-19 smita innan fótboltafélaga. Í tilkynningu KSÍ segir að sambandið muni greina frekar frá stöðu mála eftir fundinn með stjórnvöldum eftir helgina.

Af vef KSÍ

Eins og fram hefur komið óskaði ÍSÍ fyrir hönd íþróttahreyfingarinnar eftir nánari útlistun frá sóttvarnarlækni varðandi íþróttastarfsemi fullorðinna vegna reglna sem tóku gildi á hádegi 31. júlí og fékk til baka eftirfarandi tilmæli:

1. Að gert verði hlé á æfingum og keppni í íþróttum með snertingu til 13. ágúst næstkomandi eða þar til núgildandi auglýsing um takmarkanir á samkomum fellur úr gildi.
2. Að æfingar og keppni í íþróttum án snertingar haldi áfram eftir því sem hægt er, að virtum reglum um fjöldatakmarkanir og nálægðarmörk skv. auglýsingu heilbrigðisráðherra.
3. Að sameiginlegur búnaður verði sótthreinsaður milli notkunar/notenda.

Jafnframt hvatti ÍSÍ íþróttahreyfinguna til að fara að tilmælum heilbrigðisyfirvalda og að viðhafa allar nauðsynlegar sóttvarnir.

KSÍ tekur undir með ÍSÍ og ítrekar til aðildarfélaga að ekki sé æft með snertingu iðkenda í eldri aldursflokkum (meistaraflokki og 2. flokki), að tveggja metra reglan sé virt eins og mögulegt er og æft án snertingar einstaklinga.

KSÍ mun funda með yfirvöldum strax eftir helgina, eins og fram kemur í fundargerð stjórnar frá 30. júlí, og stjórn sambandsins mun koma saman í kjölfarið og upplýsa frekar um stöðu mála.

Vegna fjölda fyrirspurna vill KSÍ taka fram að málefni 3. flokks er sérstaklega til skoðunar.

Knattspyrnuhreyfingin er hluti af samfélaginu. Það er skylda allra (leikmanna og starfsmanna liða, forsvarsmanna félaga, áhorfenda og annarra þátttakenda í knattspyrnu) að sýna ábyrgð og gæta að sóttvörnum í knattspyrnustarfinu og þar með í okkar samfélagi. Hjálpumst að, sýnum yfirvegun og samstöðu og komumst í gegnum þetta saman.