Einvígið á Nesinu fer fram þrátt fyrir hertar aðgerðir

Mynd með færslu
 Mynd: GSÍ

Einvígið á Nesinu fer fram þrátt fyrir hertar aðgerðir

01.08.2020 - 12:45
Einvígið á Nesinu, árlegt góðgerðarmót Nesklúbbsins á Seltjarnarnesi, fer fram á mánudag þrátt fyrir hertar sóttvarnaraðgerðir stjórnvalda. Áhorfendum verður meinaður aðgangur á mótið.

Löng hefð er fyrir mótinu þar sem bestu kylfingar landsins etja gjarnan kappi til að styrkja gott málefni. Mótið fer ávallt fram á frídegi verslunarmanna en það komst í uppnám líkt og aðrir íþróttaviðburðir eftir að hertar sóttvarnaraðgerðir vegna COVID-19 voru kynntar í vikunni.

Mótið mun þó fara fram, rétt eins og Íslandsmótið í golfi næstu helgi, en engir áhorfendur verða þó leyfðir. Í fyrsta skipti í sögu mótsins tókst ekki að finna styrktaraðila en tekið verður við frjálsum framlögum frá einstaklingum og fyrirtækjum. Allur ágóðinn mun renna til deilda Landspítala Íslands sem takast á við kórónuveiruna.

Íslandsmeistari síðustu tveggja ára í kvennaflokki, Guðrún Brá Björgvinsdóttir, verður á meðal keppenda í kvennaflokki rétt eins og atvinnukylfingurinn Ólafía Þórunn Kristinsdóttir. Þá verða atvinnukylfingarnir Haraldur Franklín Magnús og Axel Bóasson á meðal sterkra keppenda í karlaflokki.

Keppendur á Einvíginu á Nesinu í ár:

Andri Þór Björns­son
Axel Bóas­son
Björg­vin Sig­ur­bergs­son
Bjarki Pét­urs­son
Guðrún Brá Björg­vins­dótt­ir
Har­ald­ur Frank­lín Magnús
Há­kon Örn Magnús­son
Jó­hanna Lea Lúðvíks­dótt­ir
Ólafía Þór­unn Krist­ins­dótt­ir
Ólaf­ur Björn Lofts­son

Tengdar fréttir

Golf

Íslandsmótið í golfi fer fram á settum tíma