Mynd: Birgir Þór Harðarson - RÚV
Athugið þessi frétt er meira en 2 ára gömul.
Póstdreifing sagði upp 304 blaðberum
Póstdreifing sem er í eigu Árvakurs, útgefanda Morgunblaðsins og Torgs, sem gefur út Fréttablaðið, hefur sagt upp öllum 304 blaðberum sínum. Kristín Björk Einarsdóttir framkvæmdastjóri Póstdreifingar segir virkilega erfitt að hafa þurft að grípa til svo afdrifaríkra aðgerða, en ekki hafi verið um neitt annað að ræða. Um endurskipulagningu hafi verið að ræða og flestir verði ráðnir aftur í breyttu vinnufyrirkomulagi.
Uppsagnirnar taka gildi frá og með 1. ágúst. Hafa á samband við þá starfsmenn, sem munu fá endurráðningu, innan mánaðar.
„Þetta eru blaðberar sem starfa við útburð á höfuðborgarsvæðinu og á Akureyri og þetta er fólk á öllum aldri; frá 15 ára og upp á áttræðisaldur og flestir með þriggja mánaða uppsagnarfrest,“ segir Kristín.
Hún segir að nauðsynlegt hafi verið að ráðast í hagræðingu á rekstri fyrirtækisins. „Það er nauðsynlegt að ráðast í þessar aðgerðir. Á þessum erfiðum tímum þarf að líta í hvert horn. Vonandi getum við ráðið sem flesta í breyttu vinnufyrirkomulagi og starfshlutfalli sem við erum að vinna að.“
Auk þess að sinna útburði á Morgunblaðinu og Fréttablaðinu hefur Póstdreifing annast útburð ýmissa smærri blaða eins og bæjarblaða og auglýsingabæklinga. Kristín segir að þær áætlanir sem gerðar höfðu verið um útburð hafi ekki staðist, kórónuveirufaraldurinn hafi sett stórt strik í reikninginn. „Ég á ekki von á að það verði nein röskun á okkar starfsemi og að útburður verði með eðliegum hætti,“ segir Kristín.
