Athugið þessi frétt er meira en 2 ára gömul.

Fjórir í far­sótta­húsi á Akureyri eftir smit

31.07.2020 - 14:42
default
 Mynd: G. Starri Gylfason - RÚV
Fjögurra manna er­lend fjöl­skylda, hefur verið send í einangrun í farsóttarhúsi á Akur­eyri eftir að einn ­með­limur fjölskyldunnar greindist með virkt kórónu­veiru­smit í gær­kvöldi. Fjölskyldan hafði ekki dvalið á Akureyri áður en smitið kom upp.

Fór í aðra sýnatöku eftir að hafa fundið einkenni

Gylfi Þór Þorsteinsson, umsjónarmaður farsóttarhúsa, segir að sýni úr fjölskyldunni hafi reynst neikvæð í sýnatöku á landamærum. Eftir að einn í fjölskyldunni fór að finna fyrir einkennum var hann sendur í aðra sýnatöku og greindist með smit. Fréttablaðið greindi fyrst frá. 

„Þetta kom í ljós í seinni sýna­töku hjá einum af fjórum fjöl­skyldu­með­limum var kominn með Co­vid-19. Þau eru á núna á gistiheimili sem við tókum á leigu á Akureyri og munu dvelja þar næstu tvær vikur, hið minnsta. Það skal þó tekið fram að þau höfðu ekkert dvalið á Akureyri, “ segir Gylfi. 

Hann segir að smitrakning sé nú í fullum gangi en vildi að örðu leiti ekki tjá sig efnislega um smitið. 

Á þriðja hundrað í sóttkví

Á þriðja hundrað er nú í sóttkví og má reikna með að þeim fjölgi ört næstu daga. Níu af þeim ellefu sem greindust með innanlandssmit í gær voru ekki í sóttkví. Hertar reglur tóku gildi í dag, samkomubann er nú bundið við 100 í stað 500.