„Það besta í ömurlegri stöðu“

27.07.2020 - 16:45
Mynd: Vilhjálmur Þór / RÚV
„Við horfðum á þetta sem svo að þetta sé það besta í ömurlegri stöðu. Hér höfum við eitthvað um kaup okkar og kjör til framtíðar að segja og í leiðinni erum við að standa vörð um stéttarfélag okkar.“ Þetta sagði Guðlaug Líney Jóhannsdóttir, formaður Flugfreyjufélags Íslands, í samtali við fréttastofu nú síðdegis.

Félagsmenn í Flugfreyjufélagi Íslands samþykktu í dag kjarasamning við Icelandair með 83 prósentum atkvæða. Samningurinn byggir á sama samningi og var kolfelldur í atkvæðagreiðslu í síðasta mánuði. 

Guðlaug segir að stjórnendur Icelandair standi nú frammi fyrir því stóra verkefni að endurbyggja traustið sem glataðist í aðdraganda samninganna. 

Eins og kunnugt er tilkynnti Icelandair þann 17. júlí síðastliðinn að félagið ætlaði sér að slíta samningaviðræðum við Flugfreyjufélag Íslands og leita annað eftir samningum. Rúmum sólarhring síðar náðust samningar við FFÍ. Félagsmenn kusu um samninginn með rafrænni atkvæðagreiðslu sem fór fram um helgina. 

Nína Hjördís Þorkelsdóttir
Fréttastofa RÚV
johannav's picture
Jóhanna Vigdís Hjaltadóttir
Fréttastofa RÚV
Síðast:
Þessi þáttur er í hlaðvarpi