Mynd: RÚV
Athugið þessi frétt er meira en 8 mánaða gömul.
Snjallgangbrautir verða á fjórum stöðum í Reykjavík
Stefnt er að því að setja upp snjallgangbrautir á fjórum stöðum í Reykjavík á árinu. Þetta kemur fram í tilkynningu frá Reykjavíkurborg. Við gangbrautirnar verður tækjabúnaður sem skynjar þegar gangandi vegfarendur nálgast þær og kveikir þá á LED-götulýsingu. Lýsingin verður sett þannig upp að aðeins gangbrautin og vegfarendurnir lýsast upp.
Einnig kviknar lýsing í gangbrautarmerkinu og viðvörunarljós fyrir akandi umferð. Snjallgangbrautirnar verða á fjórum stöðum; Neshaga við Furumel, Rofabæ við Árbæjarskóla, Seljarskógum við Seljabraut og Fjallkonuveg við Logafold.
Í tilkynningunni segir að borgarráð hafi heimilað umhverfis- og skipulagssviði að bjóða út framkvæmdir við umferðaröryggismál en kostnaðaráætlun vegna verkefna ársins er 190 milljónir króna. Verkefnin eru að hluta samkvæmt áætlun um að flýta fjárfestingarverkefnum Reykjavíkurborgar með það að leiðarljósi að sporna gegn atvinnuleysi vegna kórónuveirufaraldursins.
Auk snjallgangbrautanna verður komið fyrir gangbrautum víða um borgina og gönguþveranir verða sömuleiðis bættar. Þá verða hraðalækkanir í Engjateigi, Reykjavegi, Sundlaugavegi, Laugarásvegi, Lokinhömrum og Haukdælabraut.
