Rio Tinto kvartar til Samkeppniseftirlitsins

Mynd með færslu
 Mynd: Samsett mynd
Rio Tinto lagði í dag fram formlega kvörtun til Samkeppniseftirlitsins vegna Landsvirkjunar. Að þeirra mati fela mismunandi verð í raforkusamningum Landsvirkjunar í sér mismunun gagnvart viðskiptavinum, fyrirtækið misnoti þannig markaðsráðandi stöðu sína gagnvart ISAL, álverinu í Straumsvík.

Rio Tinto fer fram á við Samkeppniseftirlitið að það taki á samkeppnishamlandi háttsemi Landsvirkjunar með mismunandi verðlagningu og langtímaorkusamningum, svo að álver ISAL og önnur íslensk framleiðsla og fyrirtæki geti keppt á alþjóðavettvangi.

Alf Barrios, forstjóri Rio Tinto Aluminium, segir í tilkynningu frá fyrirtækinu í dag:

„Það þarf að taka á misnotkun Landsvirkjunar á markaðsráðandi stöðu sinni á íslenskum orkumarkaði. Af öðrum kosti á Ísland á hættu að glata stórum útflutningsfyrirtækjum á borð við ISAL í Straumsvík. ISAL greiðir umtalsvert meira fyrir orku sína en aðrir álframleiðendur á Íslandi sem grefur undan samkeppnisstöðu fyrirtækisins. Við getum ekki haldið áfram að framleiða ál á Íslandi sé verðlagning orkunnar ekki gagnsæ, sanngjörn og alþjóðlega samkeppnishæf.“

Íhuga annars lokun álversins

Í febrúar á þessu ári tilkynntu stjórnendur Rio Tinto um að starfsemin hér á landi yrði endurskoðuð og álverinu í Straumsvík hugsanlega lokað. Þeirri endurskoðun átti upphaflega að ljúka í lok júní.

Í tilkynningu fyrirtækisins frá því í dag segir að þrátt fyrir ítrekaða viðleitni af hálfu Rio Tinto til að koma á uppbyggilegu samtali hefur fyrirtækið nú komist að þeirri niðurstöðu að Landsvirkjun sé ekki tilbúin til að bæta núverandi raforkusamning ISAL sem gerir fyrirtækið sjálfbært og samkeppnishæft og taka á skaðlegri hegðun og mismunun Landsvirkjunar gagnvart ISAL.

Láti Landsvirkjun ekki af háttsemi sinni, hafi ISAL ekki annan kost en að íhuga að segja upp orkusamningi sínum við Landsvirkjun og hefja lokun álversins.

Valgerður Árnadóttir
Fréttastofa RÚV
Síðast:
Þessi þáttur er í hlaðvarpi