Vill draga yfirlýsingu um sniðgöngu útboðs til baka

21.07.2020 - 19:14
Atvinnulíf · Innlent · Icelandair · kjaramál · VR
Mynd með færslu
 Mynd:
Ragnar Þór Ingólfsson, formaður VR, segist ætla að leggja það til við stjórn VR að fyrri yfirlýsing félagsins um sniðgöngu hlutafjárútboðs Icelandair verði dregin til baka en lýsir því yfir að hann vilji að stjórn Icelandair víki. Ragnar Þór skrifar bréf til félagsmanna VR í kvöld um þetta.

„Ég mun leggja það til við stjórn VR að fyrri yfirlýsing um sniðgöngu útboðs verði dregin til baka. Ekki vegna þess að það samdist við flugfreyjur og ekki vegna þess að samningsrétti og framtíð stéttarfélaga var bjargað fyrir horn heldur vegna þess að við erum í vinnu fyrir ykkur en ekki öfugt,“ segir Ragnar Þór í bréfinu.

Hann segist hafa fengið pósta frá félagsmönnum þar sem þeir lýsa óánægju sinni með framgöngu hans, að hann sé að vinna fyrir aðra en félagsmenn VR og upplifun þeirra á því að formaður félagsins beitti sér fyrir því að Icelandair fari í þrot.

Vill að stjórn Icelandair víki

„Til að taka af allan vafa þá viljum við bjarga félaginu. Með öllum ráðum munum við beita okkur fyrir því að það verði gert. Ég hef hinsvegar haft miklar efasemdir um að það sé gerlegt með núverandi stjórn félagsins við völd [...] Ég hef því litið á það sem viðleitni í að bjarga félaginu að krefjast þess að stjórn félagsins víki til að liðka fyrir frekari áhuga fjárfesta.“

Ragnar segist jafnframt harma það mjög að félagsmenn VR sem starfa eða störfuðu hjá Icelandair upplifi það þannig að félagið hafi ekki gengið harðar fram fyrir hönd félaga þegar hvað harðast var að þeim sótt.

Valgerður Árnadóttir
Fréttastofa RÚV
Síðast:
Þessi þáttur er í hlaðvarpi