Nokkur Íslandsmet á Íslandsmótinu í sundi

Mynd með færslu
 Mynd: Mummi Lú

Nokkur Íslandsmet á Íslandsmótinu í sundi

18.07.2020 - 19:18
Öðrum keppnisdegi Íslandsmótsins í sundi í 50 metra laug er lokið. Keppt er í Laugardalslaug og féllu nokkur Íslandsmet í dag.

Róbert Ísak Jónsson átti góðan dag í 200 metra flugsundi fatlaðra, en Róbert Ísak keppir í flokki S14. Hann bætti eigið Íslandsmet um tæpar 10 sekúndur. Hann synti á 2:16,08 í dag en gamla metið var 2:25,93.

 

Boðsundssveit SH í 4x50m skriðsundi í blönduðum flokki sló eigið met í greininni en það var fyrsti riðill mótsins í dag. Sveitin synti á tímanum 1:39,16 en hana skipuðu þau Jóhanna Elín Guðmundsdóttir, Símon Elías Statkevicius, Dadó Fenrir Jasminuson og Steingerður Hauksdóttir. Gamla metið var 1:39,95 frá því í mars 2019. 

Birnir Freyr Hálfdánarson úr SH setti drengjamet í 50m baksundi þegar hann endaði í öðru sæti á tímanum 29,16 sek. Gamla metið var 29,28 frá því í janúar á þessu ári en það var Birnir Freyr sjálfur sem átti það. 

Ylfa Lind Kristmannsdóttir úr ÍBR bætti eigið meyjamet í 50m flugsundi en hún synti á tímanum 32,35 en gamla metið hennar var 32,77 frá því í febrúar.

Þá setti sveit SH piltamet í 4x100m skriðsundi en þeir syntu á tímanum 3:42,00. Sveitina skipuðu þeir Símon Elías Statkevicius, Daði Björnsson, Veigar Hrafn Sigþórsson og Snorri Dagur Einarsson. Gamla metið átti sveit Ægis frá árinu 2017 - 3:45,89.