Mynd: Jón Guðbjörn Guðjónsson
Athugið þessi frétt er meira en 9 mánaða gömul.
Vindur hvass og hviðóttur fram eftir kvöldi
Á Siglufirði hefur úrkoman síðasta sólarhringinn mælst 117 mm og á Flateyri hefur hún mælst 91,7 mm. Veðurstofan gaf nú undir kvöld út gula viðvörun fyrir suðuausturland á morgun. Búast má við allhvassri vestanátt austan Öræfa. Þar getur vindur farið yfir 25 m/s í hviðum og er slíkt varasamt fyrir ökutæki sem taka á sig mikinn vind.
Arnór Tumi Jóhannsson, vakthafandi veðurfræðingur, segir spá Veðurstofunnar vera að ganga nokkuð vel eftir og að mikil úrkoma á þessum slóðum sé helsta áhyggjuefnið.
Á Flateyri hafa fallið yfir 25 mm síðustu sex tímana og á Siglufirði hafa 34 mm fallið á sama tíma.
Ár hafa víða bólgnað í dag og varað hefur verið við skriðuhættu á Vestfjörðum, m.a. á Suðureyri.
Eitthvað hefur dregið úr vindi, til að mynda á Snæfellsnesinu, en áfram verður allhvass og hviðóttur vindur á Vestfjörðum og landinu norðvestanverðu og segir Arnór Tumi að gera megi ráð fyrir hviðum yfir 25 m/s.
„Það fer ekkert mikið að draga úr vindi á vestanverðu landinu fyrr en eftir hádegi á morgun,“ segir hann og kveður þá byrja að draga hægt og rólega úr vindi á þeim slóðum. Þá muni hins vegar hvessa á austanverðu landinu og er raunar þegar farið að hvessa á landinu suðaustanverðu, en að sögn Arnórs Tuma kann vindur að ná allt að 13-20 m/s á þessum slóðum.
