Hálfur milljarður til fyrirtækja vegna uppsagna

Mynd með færslu
 Mynd: RÚV
Skatturinn hefur greitt rúmlega hálfan milljarð króna í stuðning vegna hluta launakostnaðar á uppsagnarfresti. Opnað var fyrir umsóknir á föstudaginn fyrir viku og nú hefur Skattinum borist umsóknir frá 57 félögum. 

Stuðningurinn varðar laun allt að 800 starfsmanna í maí og júní. Hann er greiddur til fyrirtækja nánast jafnóðum. Þetta kemur fram í svari frá Skattinum við fyrirspurn fréttastofu.  

Óljóst með hvaða hætti upplýsingarnar verða birtar 

Stuðningurinn er veittur samkvæmt nýjum lögum um stuðning úr ríkissjóði vegna greiðslu hluta launakostnaðar á uppsagnarfresti sem samþykkt voru á Alþingi þann 29. maí síðastliðinn. Úrræðið var kynnt sem hluti af aðgerðum ríkisstjórnarinnar til að stemma stigu við efnahagslegum afleiðingum COVID-19 faraldursins hér á landi í lok apríl.  

Samkvæmt lögunum ber Skattinum að birta opinberlega upplýsingar um hvaða atvinnurekendur fá stuðning. Í svari frá Skattinum kemur fram að ekki liggi fyrir hvaða upplýsingar nákvæmlega verði birtar og með hvaða hætti.  

Bein útgjöld ríkissjóðs gætu numið 27 milljörðum 

Stuðningurinn nemur að hámarki 85 prósentum af launakostnaði launamanns á uppsagnarfresti og nær til þeirra sem hafa uppsagnardag frá og með 1. maí 2020 og til og með 1. október 2020. Í frétt á vef Stjórnarráðsins kemur fram að bein útgjöld ríkissjóðs vegna úrræðisins nemi um 27 milljörðum króna.  

Samkvæmt lögum þurfa fyrirtæki að uppfylla tiltekin skilyrði til að eiga rétt á stuðningi vegna uppsagna. Til dæmis þarf meðaltal mánaðartekna atvinnurekenda að hafa lækkað um a.m.k. 75 prósent í samanburði við tiltekin viðmiðunartímabil. Þá má hann ekki vera í vanskilum með opinber gjöld og ekki hafa ákvarðað úthlutun arðs frá 15. mars síðastliðnum.  

Í lögunum segir að þau gildi um „fjárstuðning til þeirra atvinnurekenda sem hafa sagt launamönnum upp störfum vegna verulegrar fjárhagslegrar röskunar á atvinnurekstri sínum og orsakir þess verða raktar beint eða óbeint til ráðstafana sem gripið hefur verið til eða aðstæðna sem að öðru leyti hafa skapast vegna faraldurs kórónuveiru sem hófst hér á landi í febrúar 2020“. 

 

hildurmj's picture
Hildur Margrét Jóhannsdóttir
Fréttastofa RÚV
Síðast:
Þessi þáttur er í hlaðvarpi