Sakar bæjarstjórn í Eyjum um lögbrot

Mynd með færslu
 Mynd: RÚV - Vegagerðin
Jónas Garðarsson, formaður samninganefndar Sjómannafélags Íslands, segir að bæjaryfirvöld í Vestmannaeyjum hafi brotið grunnréttindi launafólks. Útgerð Herjólfs ohf, sem sé í eigu bæjarins noti eigur ríkisins til að beita launafólk ofríki. Þetta kemur fram í yfirlýsingu sem Jónas sendi frá sér.

 

Tveggja sólarhringa vinnustöðvun undirmanna á Herjólfi, sem eru í Sjómannafélagi Íslands, hófst á miðnætti á mánudagskvöld og stendur til miðnættis. Þetta er önnur vinnustöðvunin af þremur, sú fyrsta var í einn sólarhring í síðustu viku og sú þriðja er fyrirhuguð  í þrjá sólarhringa frá miðnætti 21. júní, hafi ekki náðst samningar fyrir þann tíma. 

„Gamli Herjólfur mannaður verkfallsbrjótum sigldi út úr Vestmannaeyjahöfn til Landeyjarhafnar upp úr hádegi. Bæjaryfirvöld í Vestmannaeyjum hafa þar með brotið grunnréttindi launafólks; lög um vinnudeilur og gegn dómi Félagsdóms í liðinni viku. Útgerð Herjólfs ohf. sem er í eigu Vestmannaeyjabæjar notar eigur ríkisins til þess að beita launafólk lögleysu og ofríki,“ segir í yfirlýsingu Jónasar.

„Fádæma ofríki“ beitt

Þar segir að bæjaryfirvöld í Eyjum beiti þernur og háseta „fádæma ofríki og viðhafa vinnubrögð sem hafa ekki þekkst frá í kreppunni miklu og setningu laga árið 1938 um vinnustöðvanir.  Vísað er í 18. grein þeirra laga þar sem segir: „Þegar vinnustöðvun hefur verið löglega hafin, er þeim, sem hún að einhverju leyti beinist gegn, óheimilt að stuðla að því að afstýra henni með aðstoð einstakra meðlima þeirra félaga eða sambanda, sem að vinnustöðvuninni standa.“

„Frá setningu laganna hefur ekki hefur verið ágreiningur um rétt launafólks til vinnustöðvana, eða í 82 ár. Nú hefur opinbert hlutafélag brotið grundvallarreglu á vinnumarkaði. Bæjarútgerðin í Eyjum brýtur grunnréttindi launafólks og notar til þess eigur ríkisins. Alvarlegra getur málið ekki verið. Ríkisstjórn Katrínar Jakobsdóttur hlýtur að stöðva lögleysu bæjaryfirvalda í Eyjum,“ segir í yfirlýsingunni.

Einu gildi hvort um sé að ræða gamla eða nýja Herjólf

Þar er bent á að fyrir níu dögum hafi Félagsdómur úrskurðað að verkfall Sjómannafélags Íslands væri löglegt. „Dómurinn dæmdi að bæjarútgerð Vestmannaeyja bæri að gera kjarasamning við fólkið um borð í Herjólfi. Það er rétt að upplýsa að vinnuskylda háseta og þerna sem annarra skipverja um borð í Herjólfi er frá hálfsjö að morgni fram yfir miðnætti til klukkan hálftvö. Vinnutími fólksins er að 2/3 utan dagvinnutíma. Fólkinu er gert að vinna þrjár helgar í mánuði og alla hátíðardaga. Bæjaryfirvöld í Eyjum neita að fylgja fordæmi Eimskips og Samskips og fjölga þernum úr 3 í 5 yfir hásumarið vegna álags,“ skrifar Jónas.

„Þegar vélstjóri gekk í land og brottför tafðist, fór venslamaður bæjarfulltrúa í plássið og innsiglaði og innmúraði aðild bæjaryfirvalda að lögleysunni,“ segir í yfirlýsingunni. Jónas segir þar einu gilda hvort nýi eða gamli Herjólfur sigli, lögbrotið sé hið sama. Siglingamálastofnun hljóti að ganga úr skugga um hvort alls öryggis um borð sé fullnægt.

„Bæjaryfirvöld bera fulla ábyrgð ofríkinu í Eyjum. Íris Róbertsdóttir bæjarstýra segir að deilan sé ekki á hennar borði. Bæjarstýra er að skjóta sér undan ábyrgð svo eftir er tekið. Íris heldur á eina hlutabréfinu í Bæjarútgerðinni sem rekur Herjólf,“ segir í yfirlýsingunni. 

 

 

annalth's picture
Anna Lilja Þórisdóttir
Síðast:
Þessi þáttur er í hlaðvarpi