Bíða róleg og bjóða ekkert betra í kjaradeilu Herjólfs

12.07.2020 - 18:24
Mynd með færslu
 Mynd: Ólöf Ragnarsdóttir - RÚV
Guðbjartur Ellert Jónsson, framkvæmdastjóri Herjólfs ohf., segir þær kröfur sem skipverjar Herjólfs í Sjómannafélagi Íslands leggja fram augljóslega óábyrgar. Herjólfur situr við sinn keip í deilunni og býður félagsmönnum SÍ sambærilegan samning og gerður var við félagsmenn Sjómannafélagsins Jötuns

Krafa um að fjölga áhöfnum

„Málið snýst um það að við viljum að áhöfnin vinni færri daga í mánuði, sem sagt, það eigi frí tvær helgar í mánuði í staðinn fyrir eina. Það eru þrjár áhafnir sem skipta þessu með sér - við viljum að þær séu fjórar,“ segir Jónas Garðarsson, formaður samninganefndar Sjómannafélags Íslands.

„Þeir hafa sniðgengið okkur og fengu svo Sjómannaélagið Jötunn í Vestmannaeyjum til að semja við sig um nákvæmlega það sem þeir vildu sjálfir.“ 

Þrýst sé á að minnka vinnuskyldu sem nemi 25% launahækkun

Guðbjartur Ellert segir að félagsmenn séu að þrýsta á að minnka vinnuskyldu úr 190 klukkustundum á mánuði, á niu og hálfs tíma vöktum, í 142 klukkustundir á tuttugu tíma vöktum og halda sömu kjörum. Ómögulegt sé að verða við slíkum kröfum um 25% launahækkun. Álag á vöktunum sé í betra horfi en nokkru sinni fyrr eftir að fjölgað var úr tveimur áhöfnum í þrjár. Jónas segir ekkert hafa verið rætt um launin enn.

„Eins og sakir standa er ekkert annað sem hægt er að bjóða,“ segir Guðbjartur Ellert í samtali við fréttastofu. „Allir sem lesa þær kröfur sem koma fram hjá félagsmönnum Sjómannafélags Íslands sjá í hendi sér að þær kröfur eru óábyrgar.“ Hann segir þær ekki í takt við ástandið af völdum kórónuveirufaraldursins og minni eftirspurn ferðamanna.

Hann segir að Herjólfur ohf. fari eftir viðmiðum Samgöngustofu um lágmarksfjölda starfsmanna á skipinu og að mönnunarþörf á nýja Herjólfi sé minni en á hinum gamla. Launakostnaður við að fjölga starfsmönnum á vakt sé of mikill.

„Við bíðum bara róleg,“ segir Guðbjartur. „Við getum ekkert teygt okkur í þær kröfur sem SÍ setur fram.“

Að öllu óbreyttu skellur verkfall félagsmanna Sjómannafélags Íslands á miðnætti á morgun og stendur í tvo sólarhringa. Þriðja vinnustöðvun er boðuð á miðnætti aðfaranótt þriðjudagsins 21. júlí og stendur þá í þrjá sólarhringa. Flugfélagið Ernir er ekki með reglubundið flug á þriðjudögum.

Valgerður Árnadóttir
Fréttastofa RÚV
Síðast:
Þessi þáttur er í hlaðvarpi