Nær allar tegundir lemúra í útrýmingarhættu

10.07.2020 - 07:02
Mynd með færslu
 Mynd: Marta Diarra - Flickr
Nokkurn veginn allar tegundir lemúra eru í útrýmingarhættu, samkvæmt Alþjóðlegu náttúruverndarsamtökunum. Samtökin hafa birt sinn árlega válista, þar sem fjallað er um ástand og afkomu ríflega 120.000 dýrategunda um allan heim. Samkvæmt honum er um fjórðungur þeirra í mismikilli útrýmingarhættu. Þar á meðal eru 103 af þeim 107 tegundum lemúra sem þekktar eru í heiminum. Og af þeim eru 33 tegundir í bráðri útrýmingarhættu og og á mörkum þess að deyja út í náttúrunni.

Þjóðargersemi á Madagaskar

Lemúrar eru svokallaðir hálfapar og náttúruleg heimkynni þeirra er eingöngu að finna í skógum eyríkisins Madagaskar. Þótt þeir teljist til þjóðargersema þar í landi á hátíðarstundum er hart sótt að þeim og heimkynnum þeirra úr öllum áttum.

Fátækt er mikil á Madagaskar, farsóttir eru þar algengar og innviðir óburðugir. Stjórnvöld hafa því lítið aflögu til umhverfis- og náttúruverndar. Talsverðar tekjur er hins vegar að hafa af skógarhöggi og akuryrkju. Er nú svo komið að um 40 prósentum skóglendis á Madagaskar - og þar með náttúrulegum heimkynnum lemúra - hefur verið eytt á síðustu 70 árum.

„Ef menn eyðileggja eða gjörbreyta heimkynnum lemúranna í skógunum, þá lifa þeir ekki af,“ segir Russ Mittermeier, sérfræðingur í prímötum hjá Alþjóðlegu náttúruverndarsamtökunum.

Til að bæta gráu ofan á svart er svartamarkaðsbrask með lemúra arðsöm iðja, því víða má finna óvandað fólk sem er tilbúið að greiða háar fjárhæðir til að eignast lemúr sem gæludýr. 

Ævar Örn Jósepsson
Fréttastofa RÚV
Síðast:
Þessi þáttur er í hlaðvarpi