Athugið þessi frétt er meira en 9 mánaða gömul.

Hringja í eldri borgara á Akureyri og kanna líðan

08.07.2020 - 13:19
Mynd með færslu
 Mynd: RÚV - Bragi Valgeirsson - RÚV
Búsetusvið Akureyrarbæjar hefur fengið styrk frá félagsmálaráðuneytinu til að ráða þrjá starfsmenn sem sinna símhringingum til eldra fólks næstu fimm vikurnar. Með því er ætlað að kanna líðan eldri borgara eftir COVID-19 faraldurinn.

Veita stuðning og hvetja til þátttöku

Frá þessu er greint á vef Akureyrarbæjar. Þar segir að starfsmennirnir hringi í eldra fólk í bænum og bjóðist til að koma í heimsókn. Þannig verði eldri borgurum veittur stuðningur og hvatning til að efla félagslega þátttöku. 

Stór hópur eldri borgara fór í verndarsóttkví þegar faraldurinn stóð sem hæst og dró því eðli málsins samkvæmt verulega úr félagslegri virkni. Aðgerðir bæjaryfirvalda eru ætlaðar að snúa þeirri þróun við. 

Hringt í alla 80 ára og eldri

„Þegar hringt var í alla 80 ára og eldri í samvinnu við HSN, kom í ljós að fólk fann fyrir mikilli öryggistilfinningu að vita til þess að það væri verið að fylgjast með. Langflestir úr hópnum mátu stöðu sína nokkuð góða, sögðust fá aðstoð frá ættingjum og vinum. Í kjölfar tilslakana á aðgerðum breyttust hugsanlega þær aðstæður og óöryggi jókst fyrir komandi tíma,“ segir í tilkynningu frá bænum.